《編輯案頭》

 | | | 轉寄

轉載：還ngài母語運動紀念lâu客家文學講座

作者 2023.12.17

　　Vi響應1228「全國客家日」，六堆原鄉讀書學會、臺灣六堆忠義聯盟lâu客家委員會客家文化發展中心，特別ti昨晡日（十二月十六號）六堆客家文化園區合作舉辦「還ngài母語運動紀念lâu客家文學講座」，紀念35週年ke「還ngài母語運動」，me希望透過客家文學來帶大家認識客家文化、語言、生活liá teû 多元面向，共享客家文化價值。

　　昨晡日（十二月十六號）「還ngài母語運動紀念lâu客家文學講座」參加ke來賓yû客家委員會前副主委lâu六堆原鄉讀書學會理事長鍾孔炤、屏東縣前縣長吳應文、客委會委員鍾屏蘭、國立臺灣大學前社會科學院副院長邱榮舉教授、資深客語廣播人張鎮堃、右堆愛鄉基金會董事長宋廷棟、六堆忠義聯盟祕書長鍾振斌及客委會客發中心副主任吳德棋liá teû共下參加。客委會前副主委鍾孔炤表示，客委會ti 2022年公告調整十二月二十八號「還ngài母語運動日」為全國客家日，紀念1988年頭一擺由臺灣客家人行上街頭，爭取講阿姆話客家話ke社會運動，特別有意義。Liá pái紀念活動me特別帶領學員tui自然書寫、客家主體性lâu當代客家文學ke多元創作敘寫liá teû客家文學作品mò 共樣時期ke發展，來探究、理解客家文學創作對語言lâu文化傳承ke重要性。

　　客委會客發中心主任何金樑表示，中心逐年十一月舉辦ke「六堆秋收祭活動」，正得著2023年交通部觀光署首屆「觀光亮點獎－十大活動體驗類」大獎，該活動結合「六堆生態博物館」概念，以探究六堆、展示六堆、行讀六堆lâu珍寶六堆四大面向來實踐，串連六堆各鄉區特色資源，規劃多樣文化體驗性活動，帶領民眾行入六堆客家庄、認識六堆。Ên希望繼續lâu六堆地區關心客家發展ke社團、在地夥伴，共下透過liá四大面向來pûn客家ke語言、文化發展lâu傳揚，yû還啊好、還啊多樣創意ke生命力展現。