《編輯案頭》

 | | | 轉寄

轉載：桃園試辦客華雙語教師　四校申請

作者 2022.02.13

　　國家語言發展法通過，中小學九月開始必修本土語言。桃園ti新學期先試辦「百儕客華雙語教師計畫」，逐禮拜選一節「m̀-he本土語ke課」，用客、華語雙語教學，教育局目標三十to四十間學校加入，但he目前單淨四間學校申請，yû基層教師試著he因為計畫m̀ siàng人，製作雙語教材oi了忒當多時間lâu心力，教團me試著學習成效yi難檢驗。

　　桃園市客家族群yû八十萬儕人以上，市府教育局考量111學年度起，本土語文列為中小學必修課程，m̀-ko國小逐禮拜單淨一節本土語課程，為傳承客語文化，決定試辦雙語計畫，pûn學生仔yû還啊多機會學講客。 　　桃園首創ke百儕客華雙語教師計畫預計招兩百儕教師，m̀-sṳ́本土語認證，也mò限制教學科別，比將講：國語、數學、自然liá-teû課程tu做得用客話上課。參加ke人月領一千仔銀語言研究lâu教材編輯費，學期末鼓勵老師以拍片方式呈現學習成效。

　　M̀過，桃園目前yû意願ke學校單淨四間，yû龍潭雙龍國小、楊梅瑞埔國小liá-teû。桃園市教師會理事長張瓊方試著，計畫要求教師逐隻月訂教學重點目標、召開雙語教學會議liá-teû，逐隻月sa補助一千仔銀定定，拍影片僅可領大約仔一千仔銀加班補助，實在thióng少。張瓊方ya講，桃園án-nè ke專案當多，m̀-ko當多tu mò整合，怕會害學校yû當多專案計畫同時oi做，品質sa mò提升，一魚多食顛倒浪費教育資源。 　　雙龍國小校長陳莉莉坦言，當會講客ke教師mò yi多，學校目標尋三儕教師參加，目前還màng講好；續下來會鼓勵老師考著客語認證，提升教學品質。

　　桃市教育局表示，liá計畫he鼓勵性質，為強化老師本土語文聽說讀寫能力，教育局me鼓勵教師湊人組成本土語文專業學習社群，今年開始逐隻案補助一萬仔銀，國中小參加教師人數既經yû三白五十九儕人。