《編輯案頭》

 | | | 轉寄

轉載：客家文化繪本《伯公您好神》新書發表

作者 2020.07.12

　　為著pûn細人仔認識豐富ke客家文化，客家委員會客家文化發展中心liá幾年來陸續出版了以客庄節慶、傳統工藝為主題ke優質文化繪本，ya結合客家文化lâu環境生態教育內涵，推出多部「大獅兄家族人偶劇」，持續受著大家歡迎。今年出版ke《伯公您好神》文化繪本，he頭一擺改編tui同名大獅兄人偶音樂劇，透過生趣ke畫lâu文字，pûn讀者thèn-tèn大獅兄家族轉去阿公阿婆屋家liau ke腳跡，lâu獅兄家族共下認識客人重要ke信仰神祇────伯公（pak-kûng）。

　　客發中心七月八號在ti六堆客家文化園區演藝廳舉辦《伯公您好神》文化繪本新書發表會，何金樑主任特別致贈繪本pûn基督教信望愛家園、飛夢林家園、慈幼之家liá-teû育幼院代表，希望帶pûn院生mò共樣ke族群文化洗禮。園區吉祥物「大獅兄家族」lâu「伯公」ke熱情演出，pûn現場貴賓共下感受伯公ke滿滿福氣。新書發表會ya邀請客語薪傳師現場講古，舉辦yû獎徵答活動，贈送全新出版ke繪本lâu周邊文創小物，現場氣氛熱烈。

　　何主任表示，大家共下為文化傳揚共下打拼ke感覺真好，承蒙文化工作者lâu教育界人士耕耘付出，客發中心voi持續推辦還啊多文化活動、出版文化繪本，lâu各界合作，pûn族群文化繼續傳承。本書以客庄巷弄輒常看著ke「伯公」為主題。除忒客家，其他族群一个庄頭正一間伯公廟，故所liá he客庄ke特色，he客人重要ke民俗信仰lâu心靈寄託。藉由大獅兄兄弟姊妹四人轉到阿公阿婆屋家liau lâu參加伯公生ke生動故事，pûn讀者認識客庄各色伯公，ya透過融入客語字辭、互動機關lâu電子有聲書DVD，增添閱讀lâu客語學習快樂。

　　假使想oi買客發中心出版ke繪本，做得去客發中心臺灣客家文化館、六堆客家文化園區現場購買，ya做得去國家書局lâu五楠書局買，歡迎老嫩大細欣賞lâu分享客家文化繪本。