《編輯案頭》

 | | | 轉寄

轉載：客家主廚溫國智率隊，參加「2020德國IKA 奧林匹克廚藝大賽」勇奪銅牌獎

作者 2020.02.29

　　客家委員會vi鼓勵年輕客家主廚，ti海外推廣客家美食，補助客家主廚溫國智帶等客家新生代餐飲系學生16位，參加109年2月14號to 109年2月19號，ti德國斯圖加特舉辦「2020 IKA奧林匹克廚藝大賽」，得著團體膳食組「銅牌」！

　　世界奧林匹克烹飪大賽(IKA CULINARY OLYMPICS)he 1900年ti德國創立，四年一擺ke比賽，to今既經yû 120年歷史，今年he第25屆，yû 67國110隊參加，he全球廚藝界公認國際頂級烹飪賽事，得獎he盡高廚藝技能榮耀。

　　臺灣代表隊由張志騰教授擔任總教練，客家名廚溫國智為隊長，隊員yû許志滄、王貴正、黃米澤、林錫甫liá-teû廚師參賽。Vi參加liá-pái廚藝大賽，tui 108年1月to 109年1月籌備一年，ti大葉大學、環球科技大學、南開科技大學liá-teû，逐隻月tu yû團練，團練13場次，ya ti 108年9月遠赴泰國練習。團員ti練習當中鑽研國際比賽規則，提高國際賽事應賽能力，接受專業指導集中訓練lâu實戰訓練，發揮客家團隊精神，努力精進廚藝。

　　為著pûn團員熟識歐洲食雜lâu環境，比賽以前先to英國伯明翰，lâu在地後生客家鄉親交流客家美食，ya透過英國臺灣客家會梁智順會長媒合英國當地食品業者，客家料理未來會在英國ke超市lâu街項商店liá-teû通路上架，pûn英國在地ke人ya yû機會買著客家美食料理包!比賽過後，lâu德國桐花客家會陳會長玉玫合作，ti慕尼黑舉辦客家美食講座lâu廚藝示範交流饗宴，特別ke客家料理，受著來參加活動ke德國聯邦國會議員lâu巴伐利亞邦議員liá-teû嘉賓ke ô-nó！

　　Liá-pái廚藝大賽，溫主廚採用客家元素材料融入客家美食料理，lâu「梅干菜」、「桔醬」、「油蔥」、「蘿蔔封」liá-teû傳統客家醬菜lâu食材導入菜色之中，參賽ke 11道菜 yû 8道菜he客家風味料理，十分打眼，得著評審委員肯定，tui團膳組28隊中勇奪銅牌獎(金牌從缺)，以客家美食pûn世界看著臺灣!看著客家!