《油桐花ke思念》

| | | 轉寄

Thai-fùng-fâ ke sṳ̂-ngiam....大紅花ke思念

Pí ngìn kha kô ke thai-fùng-fâ
比人較高ke大紅花
Kiet hí
結起
Theù-pái ke chhiòng-vì
頭擺ke牆圍
tông-chu-theù
當晝頭
Theû-theû-é cheú hi
偷偷仔走去
Cchhiu3-súi-é ke se-ngìn-é
泅水仔ke細猴仔
Sṳ̂n yáng
身影
Hàn phân ti mien-táng
還攀ti面頂

Kién-kién ke thai-fùng-fâ-ya̍p
捲捲ke大紅花葉
Tî-tú
底肚
Chúng yiû yit-thiàu
總有一條
Chhiâng-chhiâng ke chhiâng-chhùng-é
青青ke青蟲仔
Put-kón-sṳ̀ voi lòi cheu-ku
不管時會來照顧
Chang sâng-mô ke vuk-yàm-tiâu
正生毛ke屋簷鳥
chio-chio-kún ke vi-chhòng
啾啾滾ke胃腸

Fùng-fùng ke thai-fùng-fâ
紅紅ke大紅花
yit-phì yit-phì
一皮一皮
He fùng-fùng ke kiê-kûng-ki
he紅紅ke雞公髻
Tiap sông se-ngìn-é ke ngiak-theù táng
貼上細人仔ke額頭頂
He kok kok kok
he咯咯咯─
M̀-tî chu-am ke kiê-thài
m̀知晝暗ke雞啼

Fùng-fùng ke thai-fùng-fâ
紅紅ke大紅花
Yit-lûi yit-lûi
一蕊一蕊
He sùn-chhìn ke se-â-moi
he純情ke細阿妹
Chhap sông kiâng kien-seu ke ngí-kûng sùn
插上驚見笑ke耳公唇
He chiâng──chiâng-chiâng
he靚──靚靚
Tén ngìn lòi siak ke sîn-ngiòng
等人來惜ke新娘

Fùng-fùng ke thai-fùng-fâ
紅紅ke大紅花
Cheû chón kí tô ku-hiông ngìn
招轉幾多故鄉人
Hàng chón thùng-ngièn ke ló vuk-khâ
行轉童年ke老屋家