《江秀鳳散文專欄》

 | | | 轉寄

學騎自行車

作者 江秀鳳（四縣腔） 2018.06.10

　　小學三年生該央時，看著鄰舍騎自行車（腳踏車），試著當欣羨，就lâu鄰舍好朋友借一台自行車來學騎，屋頭前he一條巷仔，鋪馬膠路，正起勢ke時節，mò法度lâu hân to lú捉平，兩下半就横到貼地，m̀過，ngài m̀死心，定著oi學會正做得，跌倒又蹶起來再ko騎，盡嚴重ke一擺he騎當遠pûn一粒石頭徑著，車仔横下來還緊向頭前蹴一路去，這擺腳膝頭lâu腳髀都鑪到血流血著，車仔騎轉去屋下，拿出藥箱仔，尋著棉仔、消毒水就煞煞點到傷口項，可能he傷口當深，實在還痛，阿姆看著遽遽放忒手項ke生事，lâu ngài then手用紗布貼傷口，喊ngài m̀好再去騎車仔了。

　　藥仔膏好，藥箱仔留pûn阿姆收，阿姆緊喊，ngài還he走出門，自行車抓（sâ）啊著又緊騎，在巷仔肚鑽來鑽去，下後騎kha穩ke時節，膽me緊來緊大，騎到大路項去，又騎去ngà好朋友屋下食點心，阿雅he ngài盡好（hó）ke同學，ngài兩儕he「挼泥m̀洗手」ke姐妹伴仔，kì看著ngài會騎自行車，me想oi學，kì就在kiâ工廠大禾埕學騎，kiâ運動神經kha好，直直箭等去，害ngài看到m̀會眨目，佢仰會án慶，一下仔就做得騎án遠。「碰！」一聲當大聲，佢在轉斡ke所在跌落馬，同ngài共樣溜皮溜骨，kì me he自家入去廳下拿藥水來搽，ngài lâu kì then手消毒，膏藥仔、包紗布，包好ke時節，ngài兩儕哈哈大笑，ngài he左腳著傷，kì右腳著傷，兩儕人手加等對方ke肩頭，lâu著(cog8)傷ke腳同時伸出來，比(pè)共下，全mò講話，兩儕就做到當自然，正經he心連心ke好朋友。

　　該日當晝，阿雅ke阿姆講工廠趕事，mò時間煮飯，oi喊披薩準晝食，喊ngài留下來食晝，ngài me mò細義半息就應好，煞煞打電話轉去lâu ngà姆講一下定定。成時阿雅來ngà屋下尞到忒暗又堵著落大雨，會在ngà屋下歇一暗晡，ngài me識在kiâ屋下歇，kiâ姆he堵著有閒ke時節，會駛車仔帶kì lâu kiâ老妹去金氏博物館、東山樂園尞，帶ngài-teû去西餐廳食好料，定著yû ngà額。

　　食飽晝，兩儕人就在kiâ大禾埕騎自行車，搭得kì腳著傷，一日就學會，ngà爸盡惜ngài，聽著ngài騎自行車ke過程，án擔硬，該年生日就買一台自行車pûn ngài，阿雅kiâ姆me共樣，在kì生日ke頭一日買自行車pûn kì，像he兩家人講好樣仔，一儕一台。下後ngài-teû去打籃球、泅水、遶夜市仔，都騎自行車共下行，還會緊走緊遠，對太平騎到台中公園，有一擺騎到霧峰食大麵，該擺轉到屋腳還軟，ngà姆看著ngài腳跛跛仔，就問ngài he腳著傷mò？Ngài lâu ngà姆像姐妹朋友樣仔，麼該話就講得，就照實lâu佢講，lâu阿雅騎自行車去霧峰，ngà姆聽著面呷青，喊ngài下二擺做m̀得騎án遠，忒危險！講忒就煞煞裝燒水放鹽pûn ngài浸腳，過半點鐘定定，已像全m̀會腳軟了。

　　Ngà姆性體盡好，m̀會噥噥噥噥，kì做得放ngài出去尞，ngài當好畫圖、唱歌仔、打球仔，做盡m̀會管酌，kì pûn ngài yû發夢ke空間，故所ngài這隻嬌尸妹仔，童年過到當快樂。


　　2018.4.29在大墩木棉樹下