《江秀鳳散文專欄》

| | | 轉寄

車仔壞忒ke時節

  Yû一擺,阿姑請ngài歸屋下人,共下去翡翠灣尞,打早5點零,就hong床,ngâ爸駛車仔出發,車仔駛to台北大街路,sa玄玄風壞忒,仰仔發就mò效,引擎(e-chhín)、電路滿哪都檢查過,車仔還he m̀會行,七早八早,街項mò人行,車仔me當少,ngâ爸打當多電話尋人來then手,電話旦旦mò人接。

  因爭阿姑ke活動yû時間限制,阿爸當緊張,顛倒he ngâ姆,喊ngài-teû m̀好吵阿爸,度ngài同阿姐坐到路脣人行道ke凳仔項,定定仔紹介liá-vi he台北仁愛路,liá條大路he顏水龍先生設計ke,路面當闊,兩片還種當多調節空氣ke樹仔,正經盡少看過án大條、án整齊ke大路,兩片he店面同辦公大樓,阿姆用手指指pûn ngài兩姐妹看,yû看著樹頂ke鳥竇,還yû肨尾鼠跳上跌落mò時閒ke身影,阿姆又喊ngài-teû目珠眨等,聽看哪!Yû麼該聲mò,阿姐耳公當利先聽著鳥仔嘰嘰啾啾ke落食聲,ngài聽著樹尾ke風聲,還yû肨尾鼠嚙樹梗ke聲,阿姆講kì聽著日頭出來ke聲,ngài兩姐妹共下講:「日頭出來哪yû聲?」阿姆講:「M̀信ǹg-teû目珠擘開來看,he m̀ he天光了。」ngài兩姐妹目珠擘開來,正經看著天光了。阿爸ke車仔me整好了,ngài-teû yu歡歡喜喜上車出發去翡翠灣飯店遶尞。

  車仔壞忒ke時節,ngâ姆還做得老神在在,坐到人行道,教ngài兩姐妹聽打早mò車仔ke街路,有各種án好聽ke聲。

  阿姆,你he世界項盡好ke阿姆,做ngiâ妹仔還幸福、還好運喔!恁仔細。

                          2018.9.12