《江秀鳳散文專欄》

| | | 轉寄

拈揚尾打草蜢

  從細性體就當浪漫,逐擺出門就樂線樂線,一路行一路看山、看水、看花、看樹仔、看蟲䘆(hién),吾姆講ngài he「拈揚尾打草蜢」,比起別人,ngài yû kha恬靜,除忒基本ke禮貌,單淨會lâu叔婆伯姆相借問定定,m̀曉得同人講長講短,一半擺仔同一陣人共下行,me-he恬恬mò話講,罕得多嘴。

  吾姆識lâu ngài講:「He yû人lâu你講別人ke壞話,定著m̀好傳出去,假使he yû人ô-nó人,就oi講pûn人聽,做細妹人,口德盡重要。」阿姆這句話,ngài記一生人,就算yû人捎吾壞話,ya-he冤枉ngài,一概mò回應,阿姆講:「Yû智慧ke人,會還你清白,m̀使愁。」

  戴到都市ke時節,出門總he oi過街弄巷,下把仔阿姆喊ngài買東西,ngài盡好行巷路仔,巷路項盡多人種花花草草,像這下四月時節mak-kai花就yû:大紅花、樹蘭花、新丁花、吊菜花、辣椒花……,正經mò騙你,都市人ke吊菜仔、辣椒仔he「花缽仔種菜──mò園(mò緣)」,辣椒仔開白花、吊菜仔葉浸青大大皮開吊菜色ke花,樹蘭開黃花細細粒仔歸串歸串仔當香,一下mò注意行過vang,鼻著香味就會行倒轉來尋,尋著ke時節就會用手準做扇仔,細細力撥到鼻公頭鼻香。

  先生yû教做m̀得lâu花摘下來,該he大家ke,oi留pûn別人看靚,me做m̀得lâu花枝拗過來鼻,mò堵好會傷著花,一蕊花一生人正開一擺,oi pûn佢開kha久兜仔,pûn kha多人看著正m̀會打爽佢開到恁靚。

  Yû一日,行過大紅花樹下,該頭大紅花比ngài高兩倍,一年四季開紅花,該日看著樹桱項當多蟲仔趖來趖去,行兼看真哪,阿姆哀哦!Ngióng會án多咖啡色ke臭鼻蟲,像蟻公樣仔歸陣仔緊停動,kì同樹桱ke色目共色,mò注意看還看m̀清,成時會趖到若圓身項臭嗙嗙(phâng phâng)仔還得人惱。在都市想oi看著花蛄仔盡少,oi在mò汙染、mò農藥ke環境正yû,一半擺仔會在巷仔肚看著,ngài會跍下來看kì定定仔爬,花姑仔紅色烏點生到圓圓盡得人惜,揚蝶仔滿哪飛上飛下,揚尾仔oi等到會落雨ke時節正會出來,歸大陣像細飛行機樣仔,在台中火車頭前ke綠川細圳仔頂聚總,還鬧熱哪!當多過路ke人會頓腳下來欣賞,人lâu水圳還有揚尾仔ke畫面盡生趣。

  等ngài買好東西轉來,準會pûn阿姆罵:「喊你去買一罐豆油,你yu走去拈揚尾打草蜢,等到你轉來,ngài就煮好食飯囉。」

   2018.4.27在大墩木棉樹下