《江秀鳳散文專欄》

| | | 轉寄

落腳台中

Ngà姆在苗栗大山頂出世,下後搬到台北,會落腳台中全為著ngài,在四、五歲該央時,ngài chho̍k-tó「百日嗽」,嗽當久就m̀會好。Yû一日阿姨tui台中來ngà屋下尞,看ngài嗽m̀會煞,ngà爺哀又oi上班賺錢,ngà姆he蠟燭兩頭焼,面黃人瘦,阿姨看著盡m̀盼得,就lâu ngài渡轉去台中照顧。

  講著ngà姨盡惜ngài,日日就買牛乳pûn ngài準滾水食,渡等ngài中醫、西醫看透透,聽人講哪位yû先生當慶,較遠就渡ngài去。Ngài he一個平時恬恬,應一句話就像打雷公ke細人仔,姨丈盡好頂碓ngài,ngài逐擺應話就超過kì-teû ke想像,pûn kì-teû笑到當暢,ngà姆講該安到「詩ke語言」,故所阿姨同姨丈麼个就會買pûn ngài,衫褲、鞋襪、人公仔,哪就渡ngài去liau,lâu ngài準做自家ke妺仔惜。

  下後阿姨建議吾爸吾姆搬到台中歇,為著ngà ke康健,正經歸屋下人搬來台中太平。搬到台中,除忒阿姨以外,還有一個表阿姨,he ngà姐婆厥老妹ke妺仔,其他在台中全mò熟事人,講起來ngà爺哀me當勇敢,來到台中尋頭路絡食做盡oi從頭起勢,一切白手捉魚尋事做,畜一屋下人。

  還記得pûn阿姨畜到肥固固仔,生肉生到像雞胲仔樣,鄰舍叔姆同ngà姨講:「M̀好再ko pûn kì食恁多了,你看厥肉強強會必開來了。」

  搬到台中,ngà姐比ngài還較暢,kì比ngài大三、四歲,轉學ke時節先生講:「台北來ke就he mò共樣,麼个就曉得,功課好、畫圖、運動樣樣會」頭擺打頭名ke同學pûn kì打下來,閼到mò-oi lâu ngà姐講話。

  Ngà姆輒輒講,搬來台中當好,這位天時好,上班騎o-to-pái做得一路看天看雲看屋仔,tui律師事務所行到法院辦公室,行巷路,歸路仔一年四季都yû人種花草,yu靚yu萋還打眼,yû一日ngà姆tui舊監獄高牆下行過,堵堵正落大雨落忒,有一大陣蝓螺仔,像比賽樣仔,歸扇壁淰淰趖往上,還壯觀哪!大家m̀識看過ke植物當多,ngà姆看著歸婆蘿浸青ke葉仔肚項,囥等一粒一粒圓圓mò拳頭嫲恁大粒ke青果子,就摘一粒下來,帶轉去辦公室問同事,同事lâu ngà姆講該he愛玉,等kì必開來,就做得拿來洗愛玉,加糖攞涼水食。

  台中he一個文化城,ngà姆在這位正開始教作文班、寫詩、寫文章,對華語寫到學老,這下全力寫kì自家ke阿姆話用「客語文創作」,ngà爸me在台中做頭路做到yi順序,好得yû台中ke好光景,pûn ngài留下靚靚ke童年。

  2018.5.8在台中55路公車頂