《客家消息》

| | | 轉寄

轉載:全國頭一擺客家主題馬拉松

  為著推廣運動健身lâu六堆美濃客庄旅遊,客家委員會主任委員李永得拜五(6/14)出席全國頭一擺客家主題馬拉松「Hakka Power 2019六堆客庄馬拉松」賽事記者會,熱情邀請全國跑友10月20號來高雄美濃共下走相逐,親身體驗六堆客庄ke好山好水。

  Liá擺me-he頭一擺選在高屏客庄六堆ke右堆,賽道經過美濃、六龜重要景點,比將講:獅子頭水圳、美濃水橋、美濃舊橋、東門樓、宣講堂lâu瀰濃庄敬字亭liá-teû歷史建築古蹟,lâu美濃湖、美濃山下lâu新威森林公園liá-teû自然美景。

  「Hakka Power 2019六堆客庄馬拉松」比照國內大型賽規格,m̀單淨oi凝聚六堆客庄向心力,ya希望進一步引導遊客、跑者深入南部六堆客庄,pûn大家看著右堆地區yû幾靚。因爭liá-pái賽事設yû「創意競賽項目」,希望大家做得著等yû客家元素ke衫服、配件來參賽,只要呈現活潑、多元ke客家元素,就yû機會得著獎金。

  客委會表示,「Hakka Power 2019六堆客庄馬拉松」,賽事前一暗晡(10月19號),voi舉行「選手之夜」,演出陣容he美濃出身ke知名音樂人林生祥lâu其他優質樂團,oi pûn跑者感受客家音樂ke美好。賽事該日分cho三組:客庄活力組(42.195公里,報名費800元)、客庄遶尞組(25公里,報名費600元)lâu客庄爽快組(5公里,報名費300元),選手完成賽事後,做得領著紀念衣、運動束口袋lâu美濃農產伴手禮,現場還會發送小農市集六十銀元消費券,pûn大家做得買當地ke chîh-chhî ke農產品。


開放報名時間:Liá-ha to八月二十號。


報名網站:https://bao-ming.com/eb/www/activity_content.php?activitysn=3819