《客家消息》

 | | | 轉寄

轉載：鍾肇政百歲冥誕系列活動

作者 2024.10.06

　　今年he客家文學大師鍾肇政先生百歲冥誕，桃園市客家文化基金會以「文學百分百」為題，ti十月十二號to十二月十五號辦理回顧特展lâu發表鍾肇政百歲冥誕紀念專書liá teû系列活動。開幕當天安排龍潭愛樂管弦樂團lâu龍潭高原國小阿卡貝拉團合作同龍潭三和里長謝金ke客家山歌演唱，打造文學加音樂ke視聽饗宴。

　　鍾肇政先生，m̀單淨he臺灣yû名ke大文學家，kì me he客家社會運動家，因為yû kì，正yû今晡日ke客家榮景。今年堵好he龍元宮建廟200年，桃園市客基會以鍾肇政先生為主題，尋出鍾肇政先生文學肚燒暖ke好料理，請在地餐廳合作開發特色餐盒，十月十二號該日現場開放三百儕民眾報名參加，食好食ke飯包，欣賞豐富表演，共下懷念鍾肇政先生。

　　十月十三號to十二月十五號，龍潭武德殿me舉辦記憶回顧特展，用時光機ke意象，愐想鍾肇政先生同大家共下行過ke百年，緬懷精彩文學著作lâu日常生活。Ko以鍾肇政〈故鄉雜憶〉文本，開設呼應主題ke彈弓、孔明燈lâu紙鷂liá teû手作課程。

　　客基會me規劃咧「龍潭信仰」lâu「文學地景」ke走讀體驗，邀請台灣鍾肇政文學推廣協會理事長鍾延威，帶大家行入鍾肇政故居、龍潭大池、遙望乳姑山、龍潭市街lâu龍元宮，thèn等鍾肇政先生ke文學，體驗龍潭百年文風。

　　客基會執行長范姜泰基表示，系列活動重頭戲he十二月初發表「紀念鍾肇政先生百歲冥誕專書」，專書m̀單淨會收錄文學百分百系列活動精彩歷程，還yû文友lâu學生仔對鍾肇政老師ke回憶錄。