《客家消息》

 | | | 轉寄

轉載：貓裏紅茶x圓山大飯店

作者 2023.12.31

　　Vi推廣客庄特色茶產業，輔導產業品牌化，lâu出名企業合作共下推廣，客家委員會十二月二十九號ti臺北圓山大飯店舉辦「客庄貓裏紅茶品茗饗宴」，客委會主任委員楊長鎮感謝圓山大飯店同客委會合作推出貓裏紅茶，希望pûn傳統道地ke客庄特產yû機會出現在當代日常生活場景，還啊多人看著，pûn客家地方品牌豐富臺灣當代ke生活文化。

　　楊主委表示，客委會這幾年推動八大客家地方品牌，希望整合社區在地力量，透過地方品牌ke打造，pûn社區ke經濟鏈還啊緊密。另外，還oi翻轉客庄美食ke使用場景，pûn這兜非常精緻、道地ke傳統土產做得行入現代、日常生活，帶動客庄就業機會同經濟發展。

　　Liá擺品茗饗宴邀請出名飲食作家葉怡蘭、圓山大飯店林育生董事長、農業部茶lâu飲料作物改良場邱垂豐副場長，共下品茗客庄特yû貓裏紅茶，pûn hau lîm紅茶ke人另外一種客庄風味。飲食作家葉怡蘭試著，比起別ke茶，紅茶2當像kha簡單隨性，liá me he kì做麼中意紅茶，過去hau lîm紅茶ke人，kha tî紅玉紅茶定定，liá擺yû機會lîm著客庄特yû ke貓裏紅茶，馬上pûn liá特yû ke蜜香、花果香氣xiang3著，尤其he該甘甜喉韻，歡迎hau lîm紅茶ke人好好品味。

　　圓山大飯店林育生董事長講，扶持在地產業一直都he帶領圓山大飯店核心價值之一，自lîm過貓裏紅茶，kì就緊愐oi ngióng pân推廣liá項臺灣客庄特yû ke茶，堵好圓山大飯店he國家級飯店，ên lâu貓裏紅茶、酸柑茶同桶柑餅結合做禮盒，以支持lâu推廣臺灣在地產業。

　　農業部茶同飲料作物改良場邱垂豐副場長表示，貓裏紅茶he以青心大冇ke一心二葉茶菁作原料，ko融合東方美人茶萎凋技術lâu紅茶發酵工法製作做成。該茶葉條索勻稱、前段蜜香入舌、後韻果香凝喉。Yû烏龍茶lâu紅茶ke花果香氣同東方美人茶ke甘甜喉韻蜜香醇厚、唇齒回甘。好食茶ke人歡迎lîm看仔。

　　Lîm客委會lâu圓山大飯店合作ke「果香茗茶禮盒」，既經十二月二十九號開放訂購，歡迎大家同圓山大飯店洽詢訂購方式，禮盒賣忒就mò。大家me做得直接線上買(網址：https://reurl.cc/mrLGMV)。