《客家消息》

| | | 轉寄

轉載:2017精緻客家大戲《膨風美人》巡臺演出

為推廣客家傳統戲曲藝術,客家委員會辦理「2017精緻客家大戲巡演活動」,由連續三年得著傳藝金曲獎肯定ke「榮興客家採茶劇團」擔綱演出,ti 7月21號至12月23號,在臺中、花蓮、桃園、高雄、苗栗、新竹lâu臺北7縣(市)巡演,歡迎鄉親把握難得機會,湊鄰舍共下去看戲。

客家委員會主任委員李永得表示,傳統客家戲曲he客家文化重要表徵,ya-he臺灣珍貴ke多元無形文化資產。國際有名ke「東方美人茶」,ên客人喊佢「膨風茶」,獨特熟果lâu蜜香lô共下ke天然甜味,深受海內外各界人士ke喜愛。2017精緻客家大戲《膨風美人》,就he運用「北埔」和「峨眉」cho時空背景,以「茶」為主題,規劃一齣充滿「愛」ke浪漫愛情喜劇,讓民眾還卡了解臺三線特有ke客庄文化lâu歷史記憶。
榮興客家採茶劇團ya表示,這擺lâu傳統客家三腳採茶戲mò共樣,《膨風美人》he全新編劇,以幽默、詼諧、輕鬆lâu逗趣編導手法,闡述客家兒女愛情;媒人婆lâu父母ke鬥智lâu鬥勁;ya-yû採茶lâu茶博會競賽ke大場面情景。整齣戲曲說唱間涵蓋大量通俗ke客家老古人言,充分展現客庄ke文化、產業lâu常民生活。

「2017精緻客家大戲」頭一擺會在臺中國家歌劇院、大東文化藝術中心lâu臺灣戲曲中心售票演出,民眾做得to兩廳院售票系統買票仔,yû敬老、學生lâu身心障礙者ke多元優惠方案,還有團體購票10張以上8折,20張以上6折,30張以上5折優惠;另外在花蓮縣文化局演藝廳、桃園市中壢藝術館、苗栗縣文化觀光局中正堂lâu新竹市文化局演藝廳,ya-yû開放索票場次,想看戲做得to各演出地點索票入場。每場次還yû準備精美限量「東方美人茶」茶包贈送觀眾,歡迎大家來看戲!