《客家消息》

| | | 轉寄

轉載:「遶尞右堆跈ngài行」右堆聚落特展

  右堆he高屏地區六堆客庄之一,今晡日ke屏東縣高樹鄉、高雄市美濃、六龜、杉林、甲仙liá-teû tu he右堆,為推廣客家文化,pûn民眾深入瞭解分屬六堆mò共樣所在ke在地客家特色文化,客家委員會客家文化發展中心,特別ti 108年9月25號在六堆客家文化園區第一特展室,展出為期一年半ke「遶尞右堆跈ngài行」。

  Liá-pài特展大量運用具象造景,呈現右堆各鄉區特色名勝,包含竹仔門發電廠ke LED燈飾特效、水圳流水聲、大津瀑布光影、美濃湖刻正復育ke水雉模型liá-teû,以盡衝擊ke感官效果pûn觀眾正踏入展場就做得看著屬於右堆ke精華景色;yu針對古今產業ke轉變lâu文化發展ke演化系列敘事,包含年在ke禾仔、菸葉輪作轉為今晡日ke小農經濟、各式蔬果栽培,lâu tui鸞堂、雙姓堂盛行ke傳統信仰習俗,發展成今晡日在mò共樣領域中以愛鄉、愛土為宗旨ke各種新興社團。

  客家委員會副主委楊長鎮講:「右堆雖然he南部客庄盡慢開發ke地區,m̀過因為地形kha獨立區隔,保留了當多傳統客家文化,發展出自家ke在地信仰,尤其開山打林時節面對天災lâu族群邊界資源紛爭,oi強大有力ke精神寄託,就án-nè yû大路關石獅公信仰、美濃二月戲祈福、新威祭河江、高樹恩公祭liá-teû獨特文化。

  Liá擺展覽也紹介當多在地ke藝文人士、知名歌手,lâu今晡日右堆創生產業,希望透過展覽lâu右堆ke精華故事帶pûn所有ke觀展民眾,同時嘉勉當代返鄉後生投入mò共樣ke產業,為家鄉注入新生命;期待大家觀展後做得to右堆來一擺深度輕旅行——遶尞右堆跈ngài行。客家文化發展中心主任何金樑針me特別感謝高雄市歷史博物館協助展前研究。下後ya會yû一系列ke DIY lâu講座活動,歡迎老嫩大細共下報名參加,還啊多ke相關資訊做得to客家文化發展中心六堆園區——最新消息查詢(網址:https://thcdc.hakka.gov.tw/wSite/mp?mp=3)。」