《李喬小說─孤燈》

| | | 轉寄

三、海天萬里(1)

親大人膝下:(請建生或者建堂賢侄代讀)

孩兒在XX兵站待命五日五夜,XX日暗晡出海,航行三個日時頭六個夜暗晡,總算平安抵達菲律賓ke馬尼拉。Liá下就在XXXke郊外。身體粗安,一切順利,請母親、阿哥阿嫂大家放心。   

我teû頭下到,還màng分配任務,也màng外出-聽講附近ke風景當靚,將來係有機會去欣賞ke時節,定著向母親報告。   

母親啊,請定著m̀使擔心掛念,賴仔早晨暗晡會為母親ke健康祈禱。雖然liá位離故鄉海天萬里,m̀過,水係連khiung-ha ke,天也共樣;白雲悠悠,來去自由自在,賴仔ke心,早晨暗晡就在母親ke sùn後喏!請母親展顏一笑吧。               

敬  祝 福   安

小兒 明基 敬叩 十二月廿八日


Liá係經檢查通過ke軍郵。   

明基用早餐留下來ke稀飯飯粒,封好信封ke時節,頰hong連自家都沒感覺ke掛等兩行清淚……   

Liá片係一排排新建ke平房。屋底背,除了兩台尺án闊ke通道之外,左片右片係兩排床鋪。   

眠床ke架仔離地面有一台尺零án高,係用連皮ke原木搭成ke;頂hong舖墊ke稻草桿單淨有六分燥;無壁,幾支木樁撐起架仔,屋頂用稻草桿加入洋槐樹ke細枝揉出來蓋成ke;單淨有沿著屋簷圍hong三尺長短ke稻草苫片,算係「壁」。   

故所眠床實際上係暴露在外片;日頭打斜斜三十度就會射入來m̀講,當晝之後亂雲帶來ke一陣驟雨,做得lâu所有床舖tuk濕。地泥hong都係沙仔做ke, 眠床下、通道,係汪汪ke積水,泥濘會yim過細腿ke腿肚。   

Án-ngiòng, 眠床ke承架變成歪歪又斜斜咧,甚至係倒thet塌thet.大家總就攬一sit稻桿,眠在天底下來睡目……。   

明基,係「軍政幹部」ke一員,住宿ke liá方,算係比較講究ke; 大空地ke對面,靠細斜坡坡麓ke一片「營地」,係重勞動ke「苦力夫」住宿ke地方。他teû用椰仔樹葉仔作墊仔,也作覆蓋,就在ke片砂礫地泥hong,個人自家想辦法解決睡目ke問題。   

今晡日係元旦,朝晨頭升旗,默念完畢,中隊長就宣佈:朝晨頭放假,自由活動;下晝在營地休息;有幾部軍車進馬尼拉城,隊員做得入去城肚三小時。   

「萬歲!」四五日ke m̀爽快ke心情,突然間得到一陣發洩。   

明基他teû坐ke「鳶丸」,係一萬噸級ke運輸艦,為到敵人ke飛航機空襲ke可能性增加,故所在半夜登陸馬尼拉,並且連夜pûn人送到liá片來。   

Liá片係馬尼拉市ke南方十公里ke「邦達抗」,係軍方航空基地ke分機構-「邦達抗油槽所」。除thet儲存lâu分配軍公用油料以外,輸送機器ke保養、修護、技術員ke訓練等,也都係本所ke職責。另外,一ke機場搶修大隊,也駐在此地。(就係露宿在大空地對面ke批人)   

邦達抗油槽所,位置就在一片紅土草原hong, 座東朝西,西南鄰近馬尼拉灣南岸ke特維加市,m̀過看m̀到美麗ke海岸;高如天ke椰仔樹林,lâu火焰般鮮紅ke m̀知mak-ke名仔ke灌木,形成美麗ke圍牆;東片弧線柔和ke矮丘陵,南北縱列lâu黃土大道平行,緊指向馬尼拉市。