《李喬小說─孤燈》

| | | 轉寄

序章:神秘ke魚 (1)

渺渺ke宇宙,茫茫ke時空,做得靜也做得動,一係萬千,萬千係一。無限個有限,合做一ke無限;無限個無限係一,係太極,係圓,係有;有係無限,也係有限。Ku-só乾坤係一座劇場,生命係一齣戲劇,虛虛實實,係趣味也係莊嚴ke悲喜演出。   

聽講,ke時節,所有ke存在體,凝聚成一ke無限密度ke圓;一ke無大細無形迹無外緣,無mak-ke m̀ pûn它吸入ke「烏洞」,以後爆炸開來,用圓ke全面向外擴展,延伸,離開,變成星雲,變成銀河,變成太陽系。空間ke本身係彎曲ke,ku-só宇宙有限又無窮;時間ke橫切就係空間;空間ke縱列就係時間,án-ngiòng一切色相有無,都係可能ke.   

聽講,地球就係爆炸開來ke一塊細碎片。Tui炙熱然後冷卻;tui雲母片麻岩,花崗片麻岩,角內片麻岩,石墨片麻岩等結晶岩,組成萬古沉寂ke太古代地球。以後,始生代時出現生物,到了古生代,生物繁衍。在古生代ke第三紀「錫魯紀」,第四紀「泥盆紀」,係生命ke旺季;魚類ke王者之鱒,就係 在 liá年代出現在地球。   

古生代末期中生代初期,半流體ke地球內部,發生劇烈ke滑移,磁極變化,地軸m̀穩。Án-ngiòng地殼變動,陸地移形,氣候異常。Liá時節,異多生物滅絕,m̀-ku更多新ke生物又紛紛創生;像哺乳動物,就係新客。人類,係 在新生代前紀正出現ke.   

Ke古老ke鱒族,還màng 在地殼劇變時期滅種,單淨係 thèn等大變動,異多族羣pûn人迫流離各地。   

Ke時,神州大陸已經形成,大摺曲ke大山脈凸起來,像地球ke巍峨頂蓋:喜馬拉雅山埃佛勒斯峯,天山,阿爾金山、崑崙山、庫魯達格山、覺克羅達格山......大雪山等平均七千公尺ke冰源,迤邐到祁連山、巴顏喀拉山、插入東海ke泰山、玉山。   

聽講,到了一萬年前,ke係第四冰期ke結束,後冰期ke時節,冰層溶化,海水陡漲,神州大陸陷入大洪水中,東海面積擴大,lâu大陸陸柵浸蝕成海棠葉緣;東海中單淨剩點點島嶼,像蕃薯,像馬蹄,像串串葡萄,像片片孤雲;ke條大蕃薯,就係台灣島。   

做大洪水驟來時,羣獸自然向高處逃命;台灣高山hong埋藏ke掩齒象,犀牛,野牛,野鹿,劍虎ke屍骨化石,就係 án-ngiòng留下來ke.