《李喬小說─荒村》

 | | | 轉寄

二、多少恨昨夜夢魂中 (12)

作者 李喬 漢羅翻寫：劉敏貞 2009.11.15

燈妹一夜都無睡。

實際上，無意中聽到阿漢lâu阿梅哥一段談話後，她就睡m̀得，坐立難安。

為到追問他teû談話ke秘密，倆公婆還吵事。Liá幾年來，阿漢chhin少pûn她紅面瞪眼ke，無想到一句：「你oi照實講來！」。阿漢大發脾氣。

「你也oi問我口供？」阿漢面色驟變。

「我係你pû娘，我......」

「有一批甘蔗màng榨乾，我 oi去看看。」阿漢kín講kín著外套，頭也m̀轉就走lè.

去！去pûn蕃仔剁！」她酸一句。

日頭差m̀多會落山時節，還oi往大南勢行，liá m̀係頸筋發癢係mak-ke ?雖然liá幾年中間，liá條水還算平靜，m̀-ku, má人敢保證mak-ke時節又出草剁人頭？在汶水、洗水坑ke片，前年lâu去年就剁掉三ke人！

阿漢ke名目係去大南勢土蔗廍。因為他係蔗廍ke三ke「司阜」之一。 阿漢走後，第二日打早，她背tén細留妹，牽著明義lâu明森到上蕃仔林阿梅哥屋家；阿梅哥家ke柴門還閂tén. 她lâu人喊醒，直接就問；

「阿梅哥：你oi老實lâu我講，昨晡日你teû在講mak-ke ?」

「無，無呀！阿漢m̀會打野食，放心好lè.」

「講正經ke !」她胸口怒氣，好像oi噴出來，對於平常十分敬重ke人無法度管lè :「你teû,又oi做mak-ke亂仔，對無？」

「亂仔？Mak-ke亂仔？」阿梅哥還在pak嘴撐腰。

「搞反日本，對m̀對？liá幾年來......」她講m̀下去lè.

「十年前詹惡事件？阿漢判刑坐足一年半監牢出來以後，隘勇ke職務自然丟掉，liá十年間，除thet拓開屋後ke兩分地蕃薯園lâu屋前ke片斜坡石礫地以外，sat-mâng做ke, 都係搖搖擺擺，無安定欠安全ke東西。Liá兩塊地算係官有地；阿漢甘願lâu「河水伯公」爭河床—濫墾河畔沙埔地，絕m̀肯向地主承租土地。

「Ke-teû土地，係用手段佔來ke, 係強盜；我m̀向強盜租土地！」Liá係阿漢堅持ke道理。

燈妹每聽一pái liá-ke怪論，內心就刺痛一pái—養父彭阿強悲慘ke一幕，又浮上眼前......

阿漢在三不管ke河畔沙埔濫墾，種植甘蔗，假使三年無「做大水」當然獲利豐厚，m̀-ku甘蔗園平安維持三年ke機會實在chhin細。

「你就係liá樣，甘願賭氣，m̀肯老老實實打拼！」她又惱又苦。

「M̀係我m̀肯老實打拼，係無道理；無道理，我就係m̀甘願。」阿漢理直氣狀。

「你硬吧！你有理，看你一大群子女，樣仔蓄大？」

無m̀對，十年家業無成，子女顛倒係一大串lè :明治三十八年 (1905)出獄，年底次女勤妹出世，次年三男明鼎出世，隔一歲kiung一女，滿月m̀久夭折；明治四十二年 (1909)再kiung一女兩歲後死亡；四十三年 (1910) kiung明森，然後留妹lâu明義蕃薯卵般一ke接一ke來到人間。

「燈妹，你m̀好 án ngiàm-ngiam, 我自有主張！」

「Mak-ke主張？哼！」她看一ke ke營養不良，瘦瘦乾乾ke 細人仔，內心ke怨lâu恨就消m̀落去。

「Ke-teû甘蔗呀！我向河水伯公繳租—三年來一pái大水好吧？也比向地主繳租省。Ên-teû拓yit大，甘蔗自家榨糖；我ke計畫，你就放心吧！」阿漢自信滿滿。

「就liá樣，阿漢加入大南勢ke蔗廍，在榨蔗煮糖時，擔任「司阜」—負責蔗汁下鑊，監視火候，糖漿濃度，熄火起鑊，過濾，「反沙」等一貫任務。

無m̀錯，liá兩年係「田頭伯公」保護，蒼天恩典，阿漢ke沙埔蔗園還真實事事順利。燈妹暗自歡喜，也在枕上床頭時常溫言勸告阿漢：專心賺錢養子女，千萬m̀好再惹事—Liá幾年來官廳ke監視漸漸鬆lè,翻身ke時節到lè......

Má人知，liá-ke人鐵石心腸，ke種牛，牽到江西還係ke種牛，居然又再發作lè !阿漢lâu阿梅哥ke講話，她聽到片段：

「Ke長山人，真實來lè ?」阿梅哥講。

「我係感覺liá批人chhin不凡，所以......」阿漢講。

「當然，liá係有理想，有計劃ke—你家庭負擔 án重......」

「樣仔，只有你做得參加？」

「M̀係án-ngiòng講。你也知，他teû最需要像你我liá種基層人員。」

「不管樣仔講，」阿漢一字一字，斬釘截鐵講：「十五日，苗栗天雲廟對面......ke我定著oi參加！」

「好啦。M̀-ku,我想，還係十四日下晝先出發較妥當。」

「以下ke話，就kín講kín細聲，她無法度聽清楚。她做m̀得tui阿漢口中探出底細，阿梅哥也m̀肯洩露，她sṳt向阿梅哥鄭重講：

「阿梅哥：你向來愛護阿漢，也惜我teû歸屋家大細，liá件事，你oi勸勸他chang 對。」

「唉！燈妹：我絕對無慫恿他mak-ke, 我也提醒他單人雙掌支撐歸屋家大細；我，我係lâu他講，我自家一ke人做得......」

「我teû大大細細六ke 細lai仔，三個細妹仔......」

「我知，我知。唉！阿漢ke性仔，」阿梅哥講：「我會勸他。我會盡力擋他參加liá件事情。好無？就liá樣。」

「到底mak-ke事？」

「Liá-ke......你就m̀好問lè.」

「做m̀得，我一定oi問！」她講。內心忽然間湧起強烈旺盛ke意念： 「你定著oi講清楚！」

「Liá......」阿梅哥好像也pûn她ke氣勢懾到，壓低嗓音講：「有一ke長山人，喊做羅福星，ke片政府派來台灣......」

「Ke邊mak-ke政府？」

「中國大陸，原鄉ke國民政府嘛。」

「來台灣做mak-ke ?」

「來領導台灣人革命阿。」

「革命係mak-ke ?」

「就係，就係反日本啦。」

燈妹忽然一睜眼，然後遽遽眨一下，以後又睜 a大大。睜眼，m̀係她意志底背 ke動作，係自然反射。再一pái 睜大目珠時，瞳孔sa縮a緊緊細細。

Liá時節，後頸一帶：m̀係，係背板底背；也m̀係，應該係頸筋連接背脊ke塊脊椎骨ke中心部位，像發出咻一聲，一sit細細勒勒ke, 凜冽冷涼ke尖芒慢慢向上湧起，冒出，在腦門打旋轉，然後往鼻樑之間直鑽進去，沁入圓身深處，筋肌ke夾縫，骨骼底背......。

「阿梅哥！」她大聲講。Chang講到liá片，她ke牙關就鎖tén.

「好，好。燈妹，我定著盡力擋他參加！」

「阿梅哥......」

「我liá就去尋他—他在nai位？」

她lâu阿梅哥講阿漢去nai位。阿梅哥隨時出發去大南勢。送阿梅哥背影消失在斜坡ke轉彎處時，二十年來ke種種，忽然齊集心頭，她無法度忍住；她蹲下來，攬tén明義明森kín流目汁。背上ke留妹chang對歲，最先跈tén哭起來，接著三歲ke明義lâu四歲ke明森也跈tén kín哭。

「阿姆！」M̀知mak-ke時節，一男一女兩個細人仔來到她面前。

係九歲ke勤妹lâu八歲ke明鼎。Liá兩個細人仔m̀知樣仔也摸上蕃仔林來。看到阿姆lâu弟妹kín哭，chhin自然ke, 先打開大嘴哭起來，然後撲過來。

「M̀好哭！m̀好！」她kín爬起來。

「Ke，阿姆也m̀好哭！」明鼎講。明鼎係一個細硬漢，平常就無輕易哭。

面對身前身後，還有背上子女，她ke目汁又tet下來。M̀-ku她隨時一咬牙，吞口瀾，lâu目汁逼轉去。做m̀得哭！真實做m̀得哭lè ! 她lâu自家講。

「苦難，總會過去ke !」像有一ke聲音在耳公邊響起。

嗯。應該係án樣。她想。明青，十八歲lè, 善妹十四歲lè, 明成也十二lè.細ke兩個都會then手揀柴木，挖野蕃薯，明青早已經做粗工lè; 阿漢......也m̀係真實m̀肯、m̀回頭吧。Liá幾年......

唉！可憐 ke阿漢他實在無應該一生苦守在窮鄉僻壤，他m̀係一般人，他係一個有眼光，有理想ke人，不幸他，他m̀管樣仔，一向，一向oi以子女為重。M̀係嗎？至於我燈妹......她想tén想tén,也在心肚對自家講。