《蘭軒小築》

| | | 轉寄

miang...命 第一集

自從陳屋討了大陸心舅朱芸過後,屋家ke氣氛,就同曩擺mò麼个共樣。月華嫂看到對門麗琴嫂ke賴仔去越南討ke一個辛臼,手腳又當淨利,人也yi乖巧,看在月華嫂心肝肚,也想lâu自家ke八字還未一撇ke賴仔阿松,討個姐仔。
阿松人矮dut8 dut8仔,人看起來也算老實,就he人生來矮,故所到這下三十歲,還吂有細妹朋友。隔壁鄰舍也接接介紹細妹仔分阿松,但he,看過一擺面就mò任何消息了,連電話打去,對方都m̀肯接電話。
看到親戚朋友ke妹仔、賴仔大體都成家立業,月華嫂有成時顛倒有些把ke愁哩。暗時食飽ke時節,佢同老公富強參詳愛來討一個大陸心舅ke計畫……
「恁樣也好啦,mò緊相親幾下擺都無消息,歸就早兜討歸來對阿松也好。但he這駁仔生理蓋好,到時會當無閒,該央時,我敢怕無法度去,你愛自家渡賴仔共下去大陸。」富強講。 月華嫂食朝過後,去到庄肚該間專門包辦外籍新娘ke「美滿婚友社」,入門先前,招牌還寫等「只要三十萬,保證處女……」月華嫂目佛佛仔緊看……
「你好!有麼个事嗎?」李小姐笑微微仔問。 婚友社ke李小姐,大家都喊佢「李老師」,因為在佢ke牽線之下,促成了不少佳緣。
「伯姆,你愛樣仔ke心舅啊?」李老師問了月華嫂。
「兩儕合線,細妹人乖巧就好了啦」,月華嫂恁樣回答。
李老師拿出來幾下本个相簿分月華嫂看,月華嫂講:「恁樣看多少有增差啦!你幾時還愛渡人飛過去看?」
「你寫好資料分我參考,我先擇過一擺,再分你等看愛去奈位看細妹仔;等我確定正打電話分你,等我ke消息囉!」李老師講。
該下文山識同阿爸佢等反對愛lâu阿哥討大陸心舅ke想法,佢勸阿母愛三思而行,但he兩老m̀聽……「討過來文化風俗mò共樣,敢怕連食ke慣習也差蓋多呢?」文山恁樣分析。
「庄肚也yi多人討大陸妹抑he越南心舅啊!文山,你莫愁啦!」阿姆像蓋落線樣仔。
透過婚友社ke安排,mò幾久,大略十過零日,月華嫂就帶等賴仔阿松共下去四川「尋辛臼」,出門ke時,富強還不時叮嚀月華:「愛選好兜啊心舅……mò選到忒壞看ke啊!」
坐了歸日ke飛行機,再對香港轉機,到四川,既經會斷烏。
「Hàn kioi喔,屎窟坐到會軟死哩!」阿松講。
「你感覺討隻姐仔恁簡單哦!」
「遽去洗身吧,天光日還愛早兜hong床去看你未來ke姐仔呢。」月華嫂講。
對台灣過去大陸討親ke總共有十過儕,mò就退休ke老兵,mò就he死忒姐仔ke男仔人,像阿松三十出頭ke蓋少見。'
等了會點過鐘,李老師帶大家去到另外一隻間房,過後,大家坐落來看連續進來个細妹仔,隻隻都蓋後生,有兜還m̀識半隻字,歲數盡細有十八,最大ke也有三十零……
「你有看著合意ke麼?」月華嫂問阿松。
「逐儕都無靚,mò看到中意ke。」阿松回答。
「過了五分鐘,阿松同阿姆講:「我較中意第一百空四號該位小姐。」
「兩人有了進一步ke交談,阿松也細義ke聽佢講話」。
「問了樣般?」月華嫂問李老師。
「佢講阿松人he斯文老實,但he,身高方面敢怕……」李老師恁樣回答。
「聽了佢等ke對話,阿松有兜失望。」
「再過看啊!無定著後背會有你合意ke。」李老師興蹀蹀仔講。
「歸日仔眼珠看啊下來,人也當kioi,阿松看下手錶,用手拍阿姆:我mò想擇哩!你同我看好哩,看了當多儕,就he尋mò我中意ke…」 阿松講。
「姐仔he你ke,樣愛喊我來擇呢?」阿姆咄佢講。
「你看啦,你擇好哩,我mò意見。」阿松講。
月華嫂看對面四十四號ke細阿妹仔朱芸,看起來目珠大大蕊,圓身也肥固固仔,分人感覺yi得人惜,佢又堵好he矮嬷仔,配阿松兩儕差m̀多平高定定,月華嫂就煞煞喊李老師去同對方講。
月華嫂看到李老師呢呢哪哪ke交涉,講了好久。
「樣般?該細妹仔有答應mò?」
「有啦,但he佢講愛有兩人出去外背遊嫽行行仔,兩儕認識認識。」李老師講。
間日,月華嫂就跈等佢兩儕去峨嵋山邏嫽,該日,大家都搞到蓋暢,阿松同朱芸也講仔幾兜話。兩三日ke相處,阿松慢慢仔對朱芸有好印象,暗時睡目以前,阿姆問佢:「你有中意朱芸mò?」
「有啦!」阿松講。
「該,我天光去拜託李老師去朱芸屋家講親哪!」
「就恁樣決定了,姐仔he你ke哦,到時討轉台灣,就莫怪阿姆我囉!」月華嫂講。
婚友社ke收費公訂價he三十萬,過去大陸討親時,愛先撿分人五萬,到時萬一有確定愛討親ke話,再收尾款二十五萬。阿松早早就準備好錢銀,佢歡歡喜喜將紙票拿分李老師。
「天光日來去朱芸屋家講婚事囉!放寬心啊,愛留分你且母好印象,厥妹仔正會嫁分你啊!」李老師笑笑仔同阿松講。