《《原鄉.夜合》 客語詩集》

| | | 轉寄

時間ke身影 Sṳ̀ kiân ke sṳ̂n yáng

無論朝晨暗晡世界任何地方
Mò lun cheû sṳ́n am pû sṳ kiai yim hò thi fông
響著滴滴答答ke腳步聲
Hióng tén ti ti ta ta ke kiok phu sâng
無形也無跡
Mò hìn yâ mò chiak

雪白ke浪花
siet pha̍k ke long fâ
係打皺ke時間哪
He tá chap ke sṳ̀ kiân ná
一波一皺
Yit pô yit chap
對遠遠湧過來又湧過去
Tui yán yán yúng ko lòi yu yúng ko hi

搖動閃光ke綠色葉片
Yeù thûng sám kông ke liu̍k set ya̍p phien
係水一樣流動ke時間哪
He súi yit yong liù thûng ke sṳ̀ kiân ná
帶著風吹響樹林
Tai tén fông chhôi hióng su lìm

嗶一聲
pit yit sâng
忽然間裂開ke花果
Fut yàn kiân lie̍t khôi ke fâ kó
係時間現身ke聲音哪
He sṳ̀ kiân hian sṳ̂n ke sâng yîm ná
跈著生命打開人間門
Thèn tén sên miang tá khôi ngìn kiân mùn

老婦人家面皺裡背
Ló fu ngìn kâ mien chap tî poi
偷放著時間留落ke腳跡
Theû piong tén sṳ̀ kiân liù lo̍k ke kiok chiak
向身邊ke孫仔講頭擺ke故事
Hiong sṳ̂n piên ke sûn né kóng theù pái ke ku s