《客語白話字聖經試讀版》

| | | 轉寄

Yok-hon Fuk-yîm, Thi-9-chông_1 Yî-hó Chhut-se chhiu Mô-muk ke Ngìn

約 9:1 Yâ-sû chhai lu-song khon-tó yit-ke chhut-se chhiu mô-muk ke ngìn.
約 9:2 Kiâ mùn-thù chhiu mun Kì kóng: “Sîn-sâng, liá-ke ngìn chhut-se chhiu mô-muk, he má-ngìn fam-chhui, he liá-ke ngìn chhṳ-kâ, ya-he kì-ke yà-ôi fam-chhui nò?”
約 9:3 Yâ-sû en kóng: “M̀-he liá-ke ngìn fam-chhui, ya m̀-he kì-ke yà-ôi; he-oi chhai kì sṳ̂n-song chông-hién Song-chú ke khièn-nèn.
約 9:4 Ngit-sṳ̀-theù, ngài-teû chhiu cho ‘Chhâi-khién Ngài lòi ke’ ke kûng-chok, am-pû-sṳ̀ yit-to, chhiu mò ngìn nèn kûng-chok.
約 9:5 Ngài chhai sṳ-kiên ke sṳ̀, Ngài chhiu cho sṳ-kiên ke kông.”
約 9:6 Yâ-sû kóng liá-ke fa heu, chhiu phui heú-lân chhai thi-song, chiông heú-lân lâu nài, yung liá-ke nài lòi kò kì-ke sûng-muk.
約 9:7 Yâ-sû chhiu tui kì kóng: “Hi Sî-lò-â ke chhṳ̀-thòng sé .” (Sî-lò-â fân-yi̍t chhiu-he Fung chhâi-phai ke yi-sṳ ). Só-yî kì chhiu-hi sé, chón-lòi ke sṳ̀, muk-chû chhiu khon-tet-tó lé.
約 9:8 Kì-ke lìn-sa lâu phìn-sṳ̀ sòng-sòng khon-tó kì thó-sṳ̍t ke ngìn chhiu kóng: “Liá-ke m̀-he siên-chhièn chhô-chhai liá-vi thó-sṳ̍t ke ngìn mâ?”
約 9:9 Yû ngìn kóng: “Liá-ke chhiu-he kì ! ” Yu yû phe̍t-ngìn kóng: “M̀-he kì, he lâu kì siông-chhiong thin-thin.” Kì chhṳ-kâ kóng: “Ngài chhiu-he kì.”
約 9:10 Ku-só chung-ngìn mun kì kóng: “Ngiâ muk-chû ngióng khon-tet-tó nè?”
約 9:11 Kì en kóng: “Yû yit-ke ngìn ham-cho Yâ-sû, Kì yung nam-nài, kò ngài-ke muk-chû, lâu ngài kóng: ‘Hi Sî-lò-â ke súi-chhṳ̀ sé’, ngài chhiu-hi sé, heu-lòi chhiu khon-tet-tó.”
約 9:12 Chung-ngìn chhiu mun kóng: “Kì chhai nai-vi?” Kì en kóng: “Ngài m̀ tî.”