《客語白話字聖經試讀版》

| | | 轉寄

Mâ-khó Fuk-yîm thi 6 chông_03 Sṳ̂-sé Yok-hon Ko-sṳ̂n

6:14 Hî-li̍t-vòng chhiu thâng-tó koân-he Yâ-sû yit-chhiet ke sṳ,yîn-vi Yâ-sû ke miàng-sâng chhòn-to tak só-chhai; chhiu yû ngìn kóng : “Hàng sé-lî ke Yok-hon fán-sâng, ku-só chhâi-khién kì lòi hàng liá-teû sṳ̀n-chiak.”

6:15 Yû phe̍t-ngìn kóng : “Kì he Yî-li-â”, ya yû phe̍t-ngìn kóng : “He siên-tî, chhiong kú-sṳ̀-thoi ke siên-tî.”

6:16 Hî-li̍t thâng-tó chhiu kóng : “ Pûn ngài chám-theù ke Yok-hon fán-sâng lé !”

6:17 Yîn-vi Hî-li̍t sṳt ham ngìn hi chok Yok-hon, chiông kì thak-tén, koân chhai kâm-ngiu̍k-tú, he vi-chho̍k Hî-lò-tí; yîn-vi Hî-lò-tí he Hî-li̍t ke hiûng-thi Fî-li̍t ke pû-ngiòng, chúng-he pûn kì cham-lòi cho pû-ngiòng.

6:18 Yok-hon sṳt lâu Hî-li̍t kóng : “Ngì cham hiûng-thi ke pû-ngiòng he m̀ ha̍p-fap ke.”

6:19 Kú-só, Hî-lò-tí chhiu yen-hen Yok-hon, sióng-oi sat kì; chúng-he mò kî-fi;

6:20 yîn-vi Hî-li̍t tî Yok-hon he chṳn-chhṳ̍t sṳn-kiet ke ngìn, chhiu kin-chhung pó-fu kì. Hî-li̍t tak-pái thâng-tó Yok-hon kóng ke fa, chhiu cheu hàng; chúng-he yu fôn-hí thâng kì kóng-lun.

6:21 Hî-lò-tí só tén ke kî-fi to lé. Hî-li̍t chhai kì sâng-ngit set-si̍t, chhiáng ke-teû vùn-vú pak-kôn lâu Kâ-li-li mìn-kiên ke liâng-siu;

6:22 Yèn-si̍t-chûng, Hî-lò-tí ke moi-é ngi̍p-lòi thiau-vú, Hî-li̍t lâu ngìn-hak chhin fôn-hí; Hî-li̍t-vòng chhiu lâu se-â-moi-é kóng : “Thai-fam ngì só oi ke, ngài chhiu voi sóng pûn ngì.”

6:23 Hî-li̍t yu fat-sṳ kóng : “Thai-fam ngì só khiù ngài-ke, chhiu-he ngài-ke yit-pan kông-sân, ngài ya voi pûn ngì.”

6:24 Se-â-moi-é chhut-hi mun kiâ â-mê, kóng : “Ngài oi khiù mak-ke?” Kì â-mê en kóng : “Sṳ̂-sé Yok-hon ke theù-nà.”

6:25 Se-â-moi-é ngi̍p-lòi kien vòng, khiù kóng : “Ngài oi ngì chit-sṳ̀ chiông sṳ̂-sé Yok-hon ke theù-nà piong chhai phàn-tú lòi pûn ngài.”

6:26 Vòng thâng-tó liá-ke chhiáng-khiù chhiu sṳ̍p-fûn vì-nàn; chúng-he yí-kîn chhai ngìn-hak mien-chhièn fat-sṳ lè, chhiu mò-fap-thu khî-chhie̍t liá se-â-moi-é ke chhiáng-khiù.

6:27 Vòng chit-sṳ̀ phai yit-ke vi-pîn hi nâ Yok-hon ke theù-nà lòi. Vi-pîn chhiu hi kâm-ngiu̍k, chám kì-ke theù-nà;

6:28 theù-nà chhiu piong chhai phàn-tú, nâ lòi pûn se-â-moi-é khon; kì chhiu kâu pûn kiâ mê.

6:29 Yok-hon ke mùn-thù thâng-tó, chhiu lòi chiông Yok-hon ke sṳ̂n-sṳ̂ liâng-cheú, chong chhai fùn-mu tî-poi.