《客語漢羅聖經試讀版》

| | | 轉寄

馬太福音第二十三章_02 責備假好ke人

23:13「你teû法利賽人lâu 這班假好ke經學教師慘lé ! 因為你teû在人ke面前將天國ke門關起來,因為你teû自家m̀入去,也m̀ oi pûn ke-teû想oi入ke人入去。
23:14「你teû 這班假好ke經學教師慘lâu 法利賽人慘lé ! 你teû虧欠寡婦,吞她teû ke產業。然後在人ke面前表演長篇ke祈禱。所以你teû一定會受到盡嚴ke責罰。」
23:15「你teû法利賽人lâu 這班假好ke經學教師慘lé ! 因為你teû行遍天涯海角,oi使到每一個人來入教,等到他teû入教以後,你teû卻使他teû變做比你teû加倍壞,比你teû更加當受地獄ke刑罰。
23:16「你這teû青盲 ke帶路ke人慘lé ! 你teû講:『人假使指著聖殿來發誓,就無mak-ke相關;假使有人指著聖殿肚 ke金仔來發誓,他就定著oi遵守。』
23:17你這teû青盲ke戇仔啊!借問,係金仔較重要,或者係使金仔成做聖物ke聖殿較重要喏?
23:18你teû又講:『人假使係指著祭壇來發誓就無相關;假使有人指著祭壇頂ke祭物發誓,他就定著oi遵守。』
23:19你這teû青盲仔啊!係祭物較重要,或者係使祭物成做聖ke祭壇較重要喏?
23:20總係,指著祭壇來發誓ke人,就係指著祭壇lâu一切在祭壇頂ke祭物來發誓;
23:21指著聖殿來發誓ke人,就係指著聖殿lâu 住在底背ke上主來發誓;
23:22指著天來發誓ke人,就係指著上主ke寶座lâu坐在頂高ke上主來發誓。
23:23「你teû法利賽人lâu 這班假好ke經學教師慘lé ! 因為你teû將薄荷,茴香,八角這teû香料也獻十分之一pûn上主;總係律法中較重要ke, 即係公義,憐憫,lâu信實,你teû就放掉它。其實這teû就應當oi盡力去行ke ;其他ke,也做m̀得忽略。
23:24你這teû青盲帶路ke人啊!你teû對飲料中將虻仔濾出來,總係,駱駝你teû就吞落去。
23:25「你teû法利賽人lâu 這班假好ke經學教師慘lé ! 因為你teû將杯仔lâu 盤仔ke外背洗到án淨浰,m̀-ku ke內肚就裝滿貪心lâu放蕩。
23:26青盲ke法利賽人啊,你先將杯仔ke底背洗淨浰,án-ngiòng他ke外背也會淨浰。
23:27「你teû法利賽人lâu 這班假好ke經學教師慘lé ! 因為你teû係像粉白ke墳墓,外背看起來盡靚,總係ke底背就係充滿死人骨頭lâu各樣齷齪東西。
23:28你teû也係án-ngiòng, 表面pûn人看起來十分公正,總係內心就充滿虛假lâu 邪惡。