《江秀鳳散文專欄》

| | | 轉寄

發燒

  Ngà姆讀小學一年生ke時節,戴到大山頂,有一擺寒著發燒,歸圓身焓燒,歸身仔手軟腳犁,頭那sia̍t sia̍t滾痛到會噼忒,軟怠怠仔,橫到眠床項。姐婆做事轉來,看著kì án傷當,飯就mò怕食,煞煞lâu kì揹到背囊項,一路半行帶走,揹kì下山行石粒仔路又過河壩,行過燒熝熝仔ke馬膠路,mò鞋好著ke姐婆,怕腳底痛到耐m̀得,mò怨嘆半息,淨緊講會到了!會到了!你再忍一下,m̀好睡忒喔。

  在姐婆ke背囊項,昏喋喋仔,麼个就m̀知,淨知姐婆ke背囊汗流脈絡,透(tho̍t)過吾姆心肝頭。姐婆揹等kì行忒點過鐘,正到三叉街項,先生(醫生)用手摸kiâ額頭會熝人,me mò罵姐婆,黏時就注射,又包幾包藥仔,lâu姐婆吩咐講一日食三擺,食加兜仔滾水,這兩包he有再ko發燒正食,he退燒仔就m̀使食。等注射注忒,有kha退燒了,正pûn kì兩子哀轉屋。

  透當晝搣到下晝兩三點仔,兩子哀就màng食晝,姐婆牽等kì在街項ke扁食店,喊兩碗大麵,吾姆該碗有加一粒卵,姐婆該碗mò,阿姆講:做細人仔m̀曉得想án多,歡歡喜喜煞猛食。這he kì這生人,「新娘上轎──頭一擺」在扁食店食大麵,印象當深。

  轉屋ke時節,定定仔行,正知街項腳底ke馬膠路燒到熝人還痛,過河壩ke時節,石跳仔ke石頭me會熝人,蹶到伯公下,姐婆渡kì入去拜諾,承蒙伯公保庇,這擺平安順序,順續借一杯神茶解渴,一路再ko蹶上山頂oi轉屋下,阿姆實在行m̀贏yu m̀敢講,姐婆he當靈通ke人,知kì行m̀贏仔,就跍下來揹佢,上崎ke山路罅蹶又揹等kì,試著當敗勢,姐婆he kì人生肚項,頭一個先生,姐婆教ngà姆做人oi有禮貌,堵著上家下屋ke人oi曉得相借問,人客來oi斟茶pûn人食,做人oi篤實,m̀好講花撩,me做m̀得捎人ke壞話,細人仔yû耳公mò嘴,mò若事情m̀好多嘴,甘願pûn人梟me m̀好梟人,老古人講:「擎頭三尺有神明。」人做天看,天公伯m̀會梟人,自家oi自重,別人就會信用你,he合意讀書就煞猛讀,讀加兜書下二擺大仔正m̀使做耕種人絡mò食yu艱苦。

  平時姐婆oi服侍阿大lâu姐公,又oi畜7個細人仔「耕田合耕圃做到兩頭烏」,月光出來正轉夜,還oi順續去菜園挖兜番薯、割兜菜,哪有機會lâu kì打嘴古,好得這擺發燒án傷當,正yû機會pûn姐婆揹,在án遠ke路項lâu kì講án多話,故所姐婆該央時lâu kì講ke話,逐句就記到心肝肚,一生人就篤篤仔做,做一個良善ke人,拈人mò-oi做ke事頭來做,m̀使想oi賺大錢,oi做一個有用ke人,對得起自家ke良心,暗晡頭睡目就安心,承蒙姐婆在跋崎ke山路教ngà姆一生人用m̀忒ke智慧。

  Ngà姆同ngài講這隻古,緊講緊流目汁,ngài續mò法度想像,頭擺人赤腳嫲踏艱苦ke日仔算來仰般過ke?

  2018.4.26在台中55路公車頂