《江秀鳳散文專欄》

| | | 轉寄

食酒

  鄰舍阿叔ke倈仔出車禍轉到屋,阿叔看細人仔mò麼个外傷,yu肯睡目,就話著mò要緊,頭擺人醫學知識識m̀多,到天光正知細人仔全mò氣脈,續來過身。Kiâ屋下就降一個單丁子,兩公婆艱苦盡久,ngà姆愁kì-teû忒過傷心mò煮飯食,實在he驚kì-teû想m̀開,三不二時送兜自家䌈(thak)ke粽仔、油飯、粄仔去kiâ屋下坐尞打嘴鼓。

  因爭he九歲ke細人仔mò忒,客人ke風俗,mò人舉辦喪禮,簡簡單單火化,阿伯、阿舅盡親ke親戚來安慰定定。

  一直到年下仔,阿叔來拜託ngà姆,講想oi渡ngài去看電影。會過年仔,天時當寒,ngà姆lâu ngài著一領賁賁ke襖婆,裡肚he一領紅色ke衫,烏色ke長褲,叔姆mò去,單淨阿叔渡ngài,kì喊計程車載,m̀過,mò渡ngài去看電影,sa去到婚宴現場,排場當大,還派頭哪!阿叔拿出帖仔,yû人帶路坐桌,ngài兩儕坐下來,坐脣項ke朋友問阿叔:「這he若妺仔he mò?還得人惜喔!」阿叔教ngài這喊阿叔、該喊阿姨,ngài就跈等喊,臨時做別人ke妺仔,心肝肚試著怪怪,me m̀敢講麼个,該餐幼席màng食忒,阿叔就lâu大家敬酒,還講yû事情oi先離開。

  在屋下上計程車後,阿叔yû交代,oi渡ngài去食酒,食酒食好會帶ngài去看電影,該暗晡在án高級ke飯店,食麼个好料理,全m̀記得,淨記得阿叔密密同ngài挾菜,喊ngài煞猛食,ngài恬恬緊食m̀敢多嘴,阿叔還吩咐轉到屋下,做m̀得lâu ngà姆講kì渡ngài去食酒,就講he去看電影知mò。故所菜màng出忒就渡ngài離開,正正經oi帶ngài去看電影,又驚怕忒夜轉,電影me看mò透尾就牽等ngà手離開電影院。

在計程車頂阿叔yu再ko吩咐一擺,喊ngài m̀好lâu ngà姆講kì渡ngài去食酒ke事情,幾下日前就lâu ngà姆講oi渡ngài去看電影,ngài單淨緊頷頭mò應話,心肝肚想大人仰會án多秘密,這做m̀得講,該me做m̀得講,ngà姆輒輒教ngài做m̀得講花撩,今晡日轉去oi仰結煞正好哪?

  Ngà姆盡會思量人,話著鄰舍阿叔he因為倈仔來過身,想倈仔正會想渡ngài去看電影,好回憶lâu倈仔共下ke時光,ngà姆全mò想著,he阿叔接著一張喜帖,該he當重要ke做官人oi討心臼,mò去做m̀得,官場朋友大體知kì yû細人仔,pha mò yi清楚he倈仔ya-he妹仔,一般大場面ke高級餐廳有按算人額,阿叔pha-he準備lâu叔姆共下去,叔姆m̀肯去,正會高不將渡ngài去,阿叔食酒lâu看電影全mò心mò性,這下愐起來ngài me試著盡m̀盼得。

  2018.5.17台中55路公車頂