《江秀鳳散文專欄》

| | | 轉寄

老伯婆ke金仔角

  有一日放學,lâu阿雅兩儕人用腳踢石頭,一路踢到公車牌ke矮圍牆下,看著一個老伯婆,緊lâu人問路,大家就緊搖頭走淨淨,ngài兩儕行過去ke時節,老伯婆用客話lâu ngài-teû問路,在台中用客話問路,莫怪人聽m̀識,ngài會講客話,就問伯婆oi去哪位?伯婆講oi去厥妹仔ke屋下,用蛇頭指緊比西北片,講oi去台中港路,老伯婆坐m̀著車哩,坐到太平來。問kì幾多段幾多號?Kì講m̀知,台中港路tui台中火車頭挷過去yû十八公里遠,恁長ke路oi仰般尋?Ngài-teû lâu kì講當久,me m̀知kì算來oi去哪位,包尾阿雅建議lâu kì送去派出所。

  老伯婆著等一領花花ke面衫,一領mò共樣花色ke長褲,看起來pha-he庄下來ke,揹等一隻布袋,看kì揹到斬蠻食力,阿雅講oi lâu kì揹,同時手就伸出去抓布袋,伯婆看著人oi搶厥布袋著驚一下,揪到緪緪緊搖頭m̀肯人摸厥布袋,ngài-teû mò奈何。Ngài lâu阿雅就用kì聽m̀識ke華語加上爛英文揣,厥布袋肚項he-m̀-he裝金仔角,一來m̀肯人摸著,二來看起來盡重ke款,ngài掊想he喊ngài揹,怕揹m̀贏喔!就一路上碫仔下碫仔,過紅青燈,彎彎斡斡渡kì去派出所,路項kì還要求oi停下來liau一下,差m̀多行一條街就liau一擺,漸漸仔日頭落山了,三儕ke人影越拉越長,大樓ke電火著了,路燈me一盞一盞點著,ngài lâu阿雅ke肚屎咕嚕咕嚕緊響,又me忍等牽阿伯婆過車路,kì像「老牛犂田樣仔──行當慢」,行忒會歸點鐘正行到派出所,渡kì入去交pûn警察仔,順續lâu警察先生講kì m̀會聽華語同學老話,單淨會講客話,he yû麼个問題遽遽問kì,ngài正代kì翻譯,he-mò,等下ngài走了,你兜oi仰結煞正好哪。

警察先生問kì住址,kì講m̀知,問kì電話me m̀知,問厥妹仔知kì oi來台中mò,伯婆講mò lâu厥妹仔講,阿彌陀佛,恁樣oi仰般尋正好,斷烏仔,屋下人會愁,ngài-teû肚屎yu枵,先借電話打轉屋下lâu阿姆講一下。警察先生問kì布袋裡肚裝麼个東西,跈等就伸手oi打開來,老伯婆又抓核核,警察先生越勢疑狐,擐到恁重裡肚算來裝麼个?就定定仔拐伯婆打開來pûn kì看,ngài lâu阿雅揣歸下晝,正經當想知布袋肚裝等麼个寶貝恁重要?下後警察先生半強半拉正pûn kì打開來,原來肚項裝等一袋番薯同掛等泥ke生番豆,ngài lâu阿雅對看一下,m̀敢笑出來。原來恁實疊ke土產正會恁重,這伯婆恁惜厥妹仔,甘願自家揹到腰鉗背吊me m̀肯pûn人摸。

  警察先生lâu厥同事講,先去買一粒飯包pûn kì食,又問伯婆安到麼个名,tui哪位來,妹仔安到麼个名?正打電話去彰化警察局問盡久,一間轉過一間,正尋著伯婆ke村長,村長講老伯婆有兜仔「老人痴呆症」,一儕人歇,kì mò在屋下me mò人知,搣到暗晡頭7點零,警察先生正pûn ngài lâu阿雅離開,這擺正經he肚屎枵到變背囊哩。

  2018.5.7在大墩木棉樹下