《江嵐客家文學專欄》

| | | 轉寄

山肚來ke細阿哥è 第六集

天màng光,外背就鬧洋洋,khâi鹽ke工人同煮食ke婦人家,當早就hong起來mò閒chhit-cha,昨暗晡食一碗薑絲豬肉湯,阿成朝晨精神加當好,hong起來thèn等大家去食朝,食飽坐一下,食杯茶,大家各khâi各ke擔頭,又愛開始跋khia過峎,khâi到半路,阿成線到kiâ ke鹽項yi像有麼該東西,m̀過,大家共陣行,kì me m̀敢停下來看,一直行過兩隻山頭,大家piong下來屙一下尿,食一下茶ke時節,阿成正掀開細布篷,看到茶水罐è唇有兩粒sap過ke雞卵同一團飯團,kì看一下唇項ke人,大家做盡在該食飯團,mò半sà人食雞卵,阿成心肝肚知知,定著he蓮花特別piong落來ke,kì詐意è愛屙尿,行到草竇肚項食飯團kak食雞卵,lià下,阿成正看到山腳下ke風景還靚,因爭昨暗晡落過一陣大雨,遠遠ke山頭有白雲攬腰,青色ke山一層一層,當好看。阿成正lîm一口茶thin-thin,老虎哥就咻咻滾喊大家出發哩唷。

等到阿成開始行路ke時節,續試到腳當痛,腳底貶到轉來,正知起án大ke瘭,剛下爛忒,故所痛到入骨。阿成mò講半句,又me煞煞thèn大家ke腳步出發。

老古人講過:「交官窮,交鬼死,交著牛販食了米」,交朋友看對象一等重要,總he:「thèn著覡公學打醮,thèn著和尚學唸經。」做m̀得mò細義。

老虎哥he一ke信用當好又煞猛ke貌頭,kì算數me清清楚楚,m̀會梟人,故所thèn kì做事ke人當固定,頭家me盡hau請kì做事,老虎哥ke事盡勻,阿成試到thèn老虎哥共下做事,會比自家去外背貌事有較穩定,就留下來thèn老虎哥。

青山依舊水流長,阿成thèn老虎哥共下做事也有嫩半年ke時間咧,對熱天做到寒天,發風落雨、上天落地麼該事就做過,看等就到冬下頭。過年會到è,冬節ke粄圓食忒,又加一歲。m̀知tai ti深山肚ke阿姆敢識食過粄圓,出來街市以前,阿成有當多東西m̀識食過,菜包、發粄、糍粑è、鹹菜鴨、鵝肉、魚è……,盡多東西he kì一生人頭一擺食到ke,lià半年來阿成有賺teû è錢,當想kiak-kiak過年,做得轉去看阿姆,mò想到過年到lè,大家愛用ke東西顛倒多,事做就m̀完,工人越請越多,看起來到三十暗晡就m̀使想愛liau一下。