《李喬小說─寒夜》

 | | | 轉寄

東洋蕃來了(19)

作者 李喬 漢羅翻寫：Suingi 2012.04.29

　　在雜樹林肚，在山澗泉水唇，他lâu一群群逃難ke人相遇；其中有婦人家同細人，也有潰敗逃散的義軍，還有一批不知樣仔殘留下來ke新楚軍官兵。

　　「去奈？」他不斷反問。Mò答案。M̀-he，有答案，他一直拒絕liá答案定定。故所他就跈等逃難ke人群繼續向北走。

　　 M̀多知仔，又he oi晝時刻；他又來到苗栗境內「西山」地段。肚屎又飢了，liá片儕有兩座小莊仔，居民yi像還màng歸莊。他忽然間興起入去莊仔尋尋食物ke念頭。他左顧右盼，liá正發現，有五六儕青壯漢仔就ti附近；kì-teû異像都攬等共樣心意，望等莊仔pot-tok-ngok。

　　「啊，鬼……鬼……鬼仔兵！」

　　鬼仔兵，就ti小莊子後背ke樟樹林底背，差m̀多有二十來儕黃帽黃衫佩刀帶銃ke鬼仔兵。

　　——砰！砰！砰！

　　M̀好！鬼仔兵追過來了，ko m̀-he二十儕定定——仰仔左右後方都he鬼仔兵喏？糟了！鬼仔兵pha he早就暗伏ti山腰一帶？Liá-he包圍了。

　　「包圍？」阿漢全身著火樣仔彈跳起來。他tui苗栗街東邊高崗朝東南方ke大頂坪狂奔。

　　逃命ke人，越聚越多。後背ke追兵也全mò放鬆，ko yi像緊維持大包圍ke勢態。身邊子彈嘶嘶咻咻不斷，幾下擺走ti共下ke生份難友忽然間向前一衝就仆ti地泥項——pha he中彈？

　　——「降！投降唏咯！」敵人ti後背勸降了。

　　——「苛戮殺！」

　　做m̀得降。莫斡頭看。就逃到大坪山崗項就好，或者山崗底下萬善祀一帶坎谷雜草叢中……阿漢緊激勵自家。

　　M̀-ko，voi到大坪山崗時，崗頂頂高，竟然湧出一群烏帽烏衫ke鬼仔兵。阿漢識聽人講，liá就he鬼仔ke「警察部隊」。

　　該，向龜山方向逃走吧。龜山，實際上he山崗東端高聳ke斷崖地段定定。Liá-ha ke情勢當清楚：只有ti到達龜山斷崖之前，向左轉，衝下山坡地，tui龜山下ke龜山渡口逃離苗栗，經過龜山橋，渡過大湖溪然後向鶴仔崗，五谷崗，蔴薺寮，然後到隘寮腳（公館）；假使做得逃到大湖差m̀多就做得活命吧？

　　另外一條逃命路線he經由五谷崗，折向正南方；假使做得藉河浦草叢ke掩蔽，逃進「雙峯山」山區，也he相當安全ke……

　　既經mò詳細思考ke餘地。Liá時節共下逃命ke難友有十幾人，異像都he一個想法：像講好樣仔tui龜山東側接近斷崖ke陡坡迅速衝下來——龜山渡口就ti眼前，liá-ha假使鬼仔兵埋伏ti liá片該就大劫難逃啦。

　　大家仆伏ti草叢中，m̀敢停動。M̀過苗栗街口、龜山連同大坪頂一帶ke銃聲，追兵運動ke巨大聲勢越來越迫近。

　　「賭一擺命吧。」劉阿漢心頭忽然間萌生liá個念頭。