《江秀鳳散文專欄》

 | | | 轉寄

蝠婆窿

作者 江秀鳳（四縣腔） 2018.10.07

　　自ngài yû自行車起勢，就同好朋友阿雅，還yû幾個同學騎等車仔滿哪仔溜溜去。這擺m̀知he麼儕講oi騎山路入山，就tui太平台中小鎮開始騎，先過橋to車籠埔山腳下，mò幾久就到ngà姆ke朋友「古農莊」張阿公ke農莊，ngài帶頭入去，五百零坪ke農莊門開開，mò看著半儕人，就大大聲喊：「張阿公、張阿公」，過yû一下仔，張阿公正tui水溝脣跋上來，講kì去該位挷草，草仔忒長，驚怕蛇哥囥到該，he趖入來就麻煩咧。張阿公看著ngài-teû來盡歡喜，先拿一盤肨（phong）餅請ngài-teû食，又斟kì自家種kì青草茶請ngài-teû啉，ngài這兜像mò人管酌ke細猴仔樣，全mò細義，食到歸嘴歸面，下後張阿公渡ngài-teû去看kì收藏ke犁耙碌碡，yû-teû he日本時代留下來ke紅眠床，有牌ke自行車項項都yû，該兜生鹵舊漏ke老古董，對ngài這陣在街項出世ke細人仔，一息感覺就mò，阿忠緊揪ngà衫尾追ngài好走了。Ngài-teû就同張阿公講恁仔細、正來尞，阿公吩咐ngài oi喊ngà姆來尞。Oi走ke時節，阿公同肨餅做盡包pûn ngâi-teû帶去路項食。

　　跈等車籠埔ke山路騎過兵營，一直騎to一江橋正斡右片析上山，上山ke路罅蹶，大家汗流脈絡，騎m̀贏ke時節就停下來尞一下，細人仔出門麼个就m̀曉得帶，連面帕、滾水me mò，衫帕攎起來捽汗，這條路風景當靚，歸條路跈等水路行，me會走到河壩lâu面衫脫下來搵水洗面，再過行倒轉去山路，車仔騎mò十分鐘，衫就燥了。

　　Ngài-teû oi去ke所在he清涼寺對面ke蝠婆窿，到該時節已經過晝缽𤊶仔，好得yû張阿公送ke餅仔好食，一下就pûn ngài-teû搶淨淨，ngài同阿雅去買冬瓜茶請大家食，食飽就擎等手電筒入去蝠婆窿，裡肚yu溼yu暗，ngài-teû像圓身yû牽索仔樣仔，歸擐仔共下行，空肚ke路緊行緊細條，一半擺仔又會pûn壁頂跌下來ke水滴著，該水yu冷yu冰，pûn水滴著ke人就會大嫲聲唩唩滾喊，就像he堵著鬼共樣，大家me會著驚到跳起來。

　　該條窿實在mò異長，m̀過人在暗摸胥疏ke窿肚，試著行就m̀得出去，驚驚險險行就m̀得透尾，横直yû窿ke所在，就yû鬼故事，大家就聽講這位有人死在這，想著越勢得人驚，講著ngài這兜細人仔yu驚yu好，拖拖挷挷正行出見光ke所在，在涼涼ke窿空肚行到大汗披身，行出來像拈轉一條命樣仔，還生趣，還好搞哪！


　　2018.6.20在55路公車頂