《善雄牧園》

| | | 轉寄

美門ke彼者(修訂版)

猶太人遵守一日三擺 ke禱告;早晨在九點鐘;正午;lâu申初就係下晝三點鐘。晚祭係在申初獻ke, 時常有chhin多人在ke時節進入聖殿去禱告。Ên-teû救主耶穌基督就在ke時辰於十字架上斷氣。

彼得lâu約翰都知禱告在主耶穌一生中佔重要地位。他teû現下在做祂ke工作,需要聖靈透過他約束工作,像同聖靈在主耶穌底背工作樣仔,他teû m̀知前途án-ngiòng? 他teû到聖殿來為到oi更新他teû ke能力,有ko多ke工作好做,必須有ko多ke禱告lâu神交通。故所,在ke日下晝三點鐘祈禱ke時節,彼得lâu約翰就相偕上殿禱告,看見有一ke chhin chhòi-ko ke人在所謂「美門」口求人施捨,liá人自出生就瘸腿(40零歲lè),他每日pûn人扛來聖殿ke門求救濟。

「美門」在聖殿ke範圍內,外邦人lâu以色列人ke院仔之間共有九個門,liá美門就係其中之一,係希律王所建造ke, 有30吋高,15吋寬,有金仔lâu銅ke裝飾,係一座chhin靚ke門。

當彼得他teû二人oi跨進liá門時,看見liá位瘸腿ke人向他teû求施捨,彼得lâu約翰二人就注目看他,講:「看ên-teû」。Ke位討食ke就認真看他teû, 希望他teû有所贈物。M̀-ku當他期待時,彼得就對他講:「金銀我都無,我將我所有ke pûn你,我奉拿撒勒人耶穌基督ke名,喊你起來行。」就牽他ke右手,pûn他起來,他ke弱足,隨時強壯,就跳起來、企tén, 又lâu彼得他teû入殿,邊行邊跳也ô-lo上帝。眾人見他在ô-lo上帝,又認得他係平常坐在美門ke求濟者,眾人就大驚。

自本段來看有數點教示:

1. 上帝ke救恩係比一切世上ke財務更好ke寶貴。

2. 教會門外,還有chhin多瘸腿者,等ên-teû伸手去救他teû, m̀-ku ko要緊ke就係ên-teû做m̀得做瘸腿ke人,倒在教會門外,來阻礙oi進入殿敬拜ke人。

3. 學習瘸腿者得上帝救治後,知khiung-ha入殿感謝,ô-lo上帝,liá在ên-teû信徒中也係要緊ke.

4. 將耶穌基督ke救恩pûn人。

5. 應做自立ke基督徒,做m̀得像瘸腿者求乞。