《善雄牧園》

 | | | 轉寄

尊敬老人 (修訂版)

作者 邱善雄 2011.05.22

序論：

Ên-teû台灣已經lâu世界同步進入高齡化ke社會，根據美國人口普查局訂定現代老人分為三階段，就係64歲到75歲ke輕老期，75歲到84歲ke中老期，85歲以上到壽終係老老期。這樣ke定義pûn人ke感覺人生到老還chhin有意思。總會考慮到老人在家庭、教會lâu社會已產生不可忽視ke問題，所以差m̀多在18年前創辦松年大學，普設在全國有四十ke分校，學員三千零ke人，màng信者佔三分之二，pûn老人家活到老也做得學到老。總會會喚起各教會關心老人，訂定每年10月第一主日係松年事工紀念日，pûn各教會重視高齡化ke社會；因為高齡化加上低出生率（資料顯示台灣ke出生率只有1.08%）老人多於細人仔ke數目，pûn ên-teû更重視liá問題。

本論：

一、 尊敬老人係聖經基本原則

利未記19章32節：在白頭那毛人ke面前，你oi企起來；也oi尊敬老人，還oi敬畏你ke上帝，我係耶和華。上帝在曠野中為祂ke人民立下十誡，第5誡係『應當孝敬爺ôi』又提前還有講：『若m̀照顧親屬，就係違背真道，比m̀信ke人還kha m̀好；……』。現今ke社會也ko注重敬老，在公車、捷運抑係高鐵全部設有博愛座lâu敬老票，來優待年長ke老人，何況ên-teû基督徒應該oi遵守聖經ke基本原則來pûn ên-teû ke長者最多ke敬意lâu關心。

二、 Oi-ngióng-è尊敬老人

尊敬意味就係決定pûn ên-teû ke長老最多ke敬意lâu關心，m̀係心不情不願抑係不得已，係用愛為原則，愛他teû也愛他teû所關懷ke。係心甘情願ke服侍加上溫和ke語言lâu愉快ke表情就係和顏悅色款待年長者，真正ke尊敬無所謂ke值m̀值得；應當時常照顧關心年老爺ôi ke衣食住行，現代人已經chhin少有三四代同堂，ku-só子女oi時常轉去團圓，因為老人十分重視親情，驚孫仔吵又愛看孫仔。

教會也應加強關心孤單抑係病痛ke老人家，pûn他teû照顧lâu適時ke幫助；我在彰基做院牧時節，有一位年輕ke傳道每禮拜載一位教會ke孤單老兄弟到彰基治療面臨截肢ke糖尿病直到痊癒，他ke來回車程超過一百公里，liá事情pûn我chhin感動。

三、老人oi án-ngiòng得人尊敬

1. Oi敬畏上帝，堅信依靠上帝、虔誠祈禱信靠基督ke救贖，做子孫好ke模範。

2. 活到老學到老，學無止境，特別在日新月異ke科技新知，老人家假使無學習新知，會pûn社會淘汰lâu年輕人失去交接；ên-teû台灣基督長老教會差m̀多在18年前所創設ke松年大學就係ên-teû年長者學習求新知ke好所在，讀書pûn人m̀會老。

3. 保持健康、清潔ke生活習慣，老人最好ke運動係每日慢步行，也oi注意健康，每日hong床前在眠床頂眠半分鐘，接下去在眠床頂坐半分鐘，最尾坐在眠床邊雙腳piong下半分鐘；hong床後飲一大杯溫開水沖淡血液，預防中風lâu心肌梗塞等病。也要實行少量多餐，多食青菜，均衡飲食，切忌暴飲暴食。服用適量ke營養補給品係需要ke，飲茶比飲酒好，食魚比食肉好，逐餐食七分飽。

4. 正視人生ke終局認知

老人chhin驚病lâu死，ên-teû信主ke老大人也相同會面臨病lâu死，既然係人就避免不了死亡，希伯來書講按著定命人人都有一死。保羅也講：苦阿！我ke做人，má人能救我脫離liá取死ke體呢？感謝上帝，靠著ên-teû ke主耶穌基督就能脫離（羅馬書七：24、25）。主耶穌講：復活在我、生命也在我，雖然死thet，也必復活（約翰十一25）。保羅勸年老ke人講：ên-teû原來知，ên-teû liá地上ke帳篷假使拆thet，必得神所造，m̀係人手所造，在天上永存ke 屋……（哥林多後書五1~10）。

結論：
2007年10月7號靈命日糧寫講：假使你還年輕有活力，有時節chhin難體會liá-teû老人家ke感覺，m̀-ku老人家一定感覺得到大衛王同感：『我從前年幼，現在年老』（詩篇37：25）。趁著你年輕有力時按照聖經ke原則，尊敬你身邊ke老人。

最尾有二位名人ke話值得ên-teû思考：

1、 慈濟證嚴講老人問題係社會問題，係社會一面鏡，其中chang反映出liá-ke社會有幾多情義有幾多承先啟後ke歷史、人文情義，也預示下一代老人將何去何從。

2、 基督徒評論家兼神學家F.W.Boreham：有一日我短暫ke人生將沒入黃昏，到時異乎？黎明sa要在我面前展現在日落最後一道光線，之後將有從màng見過ke白晝升起；liá日將我失去ke歲月全數追回，永遠不再有黃昏，因為ên-teû已經lâu主同在。