《善雄牧園》

| | | 轉寄

赦罪lâu平安(2) (修訂版)

現下oi來講起在馬太9:1-8所講赦罪lâu平安ke一ke真實故事。

本段係講主耶穌在祂ke本城,就係迦百農將一ke癱仔醫好ke記事。

主耶穌在屋家底背講道,有chhin多人來聽祂ke教示,也有chhin多奇奇怪怪ke病人來,要求主ke醫治,ku-só造成無空地,因為chhin多人khî在屋家內外。在ke時有一位癱仔 pûn四個人扛過來,oi來求主ke醫治,m̀-ku當他teû到主耶穌在講道理ke屋家時,看到án多人,內心就煩惱,因為liá位癱仔無辦法pûn人扛入去見主耶穌,來得到醫好。M̀-ku他teû ke信心chhin大,他teû相信主耶穌定著做得醫好liá-ke癱仔,liá-ke癱仔自家也確信,除thet主耶穌以外,無人做得醫好他ke病。M̀-ku人án多,oi ngiòng般 chang做得將liá-ke癱仔扛到主耶穌ke面前nò? 他teû為liá-ke事非常ke煩惱lâu心急,好加在最尾他teû有想出一ke辦法,就係拆耶穌ke屋頂,將liá位癱仔自屋頂lâu他縋下去主ke面前,來求醫。

Ên-teû看他teû用liá種方法,係 yit大膽lâu信心,假使ke位癱仔無得到主ke醫好,他teû會變án-ngiòng? 敢m̀係白費功勞lâu受眾人ke啼笑?M̀-ku他teû有絕對ke信仰,相信liá-pái主定著會醫好liá位癱仔,又liá位癱仔 ke信仰也相當大,他m̀驚種種艱苦、批評、啼笑,只有相信假使做得在主ke面前求醫治,一定會好。Ku-só主耶穌看見他teû ke信心,就對癱仔講:「子阿!做你安心,你ke罪赦lè.」

主耶穌講liá句係 yit親密lâu慈愛,m̀-ku ên-teû oi奇怪主所講ke話,主ngióng會講:「做你安心?你ke罪赦lè,做mak-ke無講,你ke病好lè,起來行。」因為在ke時liá位癱仔內心實在chhin m̀平安,因為他煩惱他所犯ke罪,使他ke內心痛苦不安。Ên-teû都知內心ke煩惱、病痛,係比身體ke病ko慘,箴言18:14講:「人有病痛,心做得忍耐,心假使憂傷,má人做得承擔喏?」Ku-só內心就十分不安。照看liá-ke人會造成癱仔 ke病係可能sṳt犯罪,放縱私慾,ku-só他ke病係罪惡ke代價,他ke病ke源頭係罪,假使oi根本ke治療就係反悔。

雖然他有反悔,m̀-ku還chhin掛慮他ke罪做得消滅無?當他十分煩惱時,忽然聽到主耶穌lâu他講:「子阿!做你安心,你ke罪赦lè」,liá位癱仔 係yit快樂lâu平安,不但病體得到醫好,就係內心ke罪也得到赦免,ku-só內心係 yit安慰。罪得到赦免ke人係 yit福氣、快樂lâu平安,你看liá位癱仔 ke罪得到主ke赦免後,係yit快樂lâu感激,當他聽到主命令他起來:「轉去你ke屋家時,他就遽遽遵命去行,liá係因為他ke病得到醫好lâu他所第一煩惱ke罪也同時得主ke赦免,一時內心大歡喜跳躍,一聽到主ke命令時,隨時應聲來行,從此以後liá位癱仔 m̀係癱仔,他m̀使再受病體ke束縛lâu罪ke糾纏,他oi過著他平安快樂lâu自由 ke生活。