《善雄牧園》

 | | | 轉寄

赦罪lâu平安(1) (修訂版)

作者 邱善雄 2011.12.11

Màng講到赦罪lâu平安時節，ên-teû oi先來研究罪係mak-ke？犯罪ke機會？罪ke結果係án-ngiòng?

1. Ên-teû信徒犯罪ke第一原因就係棄捨信仰ke生活，有幾多人在他內心艱苦時，無去尋安慰ke主，tiên-tó去尋物質ke安慰，像藉著飲酒或世間ke娛樂想oi來得安慰。M̀-ku án-ngiòng做得得安慰嗎？絕對做m̀得，tiên-tó 係 pûn你ko悽慘。Ku-só當你內心痛苦時oi 遽遽來尋主，在祂面前來反悔認罪或讀聖經，tui聖經底背上帝ke話來得安慰chang對，ngiòng做得tiên-tó棄捨信仰ke生活？來敗壞身體ke物質nò? 彼得I 5:8講：「Oi節制，oi儆醒，你teû ke敵對就係魔鬼，像吼獅，在尋做得吞食ke, 你teû用信仰堅固來抵擋牠，知你teû眾兄弟在世間也經過án-ngiòng ke苦難。」Ku-só ên-teû ke信仰堅固，做m̀得棄捨信仰生活，因為魔鬼在尋ke對象就係 liá種人。

2. Ên-teû信徒犯罪第二ke原因就係唯物主義ke生活，凡係棄捨信仰生活ke人，往往行入在唯物主義ke生活，唯物主義生活ke意思就係講凡事依靠自家ke sat-mâng來食、尋樂，無宗教ke心，自然就無祈禱、讀聖經，只有追求團體ke快樂，liá就係ên-teû信徒犯罪ke第二原因。

3. 罪係 mak-ke? 罪就係違背上帝ke命令，就係講當行m̀行，做m̀得行ke tiên-tó去行，像羅馬7:19保羅先生所講：「因為我所意愛ke好，我無去行，我所m̀愛ke惡tiên-tó去行。」Án-ngiòng就係罪，又犯罪就係只有行自家所中意ke, m̀管有上帝無，m̀管你三七二十一，oi弒就弒。

Eên-teû來研究犯罪ke機會係 án-ngiòng?

1. 困苦時容易犯罪，因為魔鬼看人ke心艱苦時，就施計來引誘作亂。

2. 喜樂時容易犯罪，ên-teû oi時常在chhin快樂時犯到罪，萬事亂允，像希律王快樂時亂允，結果oi 弒施洗約翰ke首級。

3. 放假時容易犯罪，因為人ke心假使係thet閑，魔鬼chhin容易入。古言有曰：「閒係眾惡之根，諸惡之源」就係講萬項ke惡都係 tui「閒」來犯到。

4. 酒醉時容易犯罪，liá大家都知，因為ên-teû時常親眼看到酒醉ke人糊塗亂言，時常得罪人，甚至弒死人，liá係 yit大ke罪，已經犯到第六誡，ku-só酒醉時容易犯罪。

最尾，ên-teû來研究犯罪ke結局係 mak-ke ?

1. Roma 6:23講：「最尾ke工錢係死」。

2. 犯罪ke結局就係苦痛、見笑、驚。

3. 犯罪ke結局就係災禍遺傳pûn子孫。

4. 犯罪ke結局就係失落愛心lâu平安，內心時常感覺m̀平安。

5. 犯罪ke結局就係做罪ke奴隸。

6. 犯罪ke結局就係在將來oi受上帝ke審判來丟下地獄受火湖ke燒，liá就係永遠ke苦痛。

到liá, ên-teû已經知犯罪係yit悽慘，在世時過著痛苦、m̀平安、受人譏笑ke生活，就係在將來也oi pûn上帝棄捨丟下地獄受永遠ke痛苦。假使án-ngiòng, 犯罪ke人oi一生過著m̀平安ke日仔嗎？Oi得到平安只有一ke方法，就係 oi將liá-ke罪赦去，chang會得到真正ke平安。