《善雄牧園》

| | | 轉寄

挪亞造方舟—上帝ke拯救(1) (修訂版)

在挪亞ke時代,世人在世間亂作,造成全地充滿罪惡,變成烏暗ke世界,故所,天頂ke耶和華上帝,看見世人罪惡滿貫,就chhin譴,後悔造人在世間,祂就宣言講:「人既然屬於肉體,我ke靈就m̀會永遠住在他teû 底背」,又因為人ke內心所想ke念頭,每日都係惡,故所上帝講:「我oi將他teû lâu地khiung-ha毀滅。」Liá係chhin驚人ke消息,上帝ngióng會降下liá種悽慘ke災禍nò ? Liá就係人違背上帝ke命令,無拜上帝,所行ke全部係罪惡,每日花天酒地,無信仰生活 (信仰生活就係祈禱、讀聖經),故所上帝chang降下liá-ke災禍。同樣,ên-teû基督徒假使無信仰生活,無時常祈禱讀聖經,無守禮拜,liá都係犯罪,也定著oi受到上帝ke刑罰。

M̀-ku ên-teû(包括聽眾)必須oi知,上帝係慈愛ke父,係分別善惡ke上帝,故所在祂oi毀滅世間ke時節,祂有尋出一位時常lâu祂親近敬拜、服侍祂ke人, liá-ke人就係挪亞lâu整家人;上帝就將他teû分別為聖,m̀會受到同樣災禍,m̀-ku ên-teû已經知上帝宣告oi用洪水來毀滅人lâu地,上帝就賜下唯一ke拯救法,就係命令挪威造方舟,上帝並親身指示挪亞造船ke方法。從liá pûn ên-teû知,當時挪亞係順服上帝,有遵照上帝命令,chang m̀-sṳt遇難,同時也提示ên-teû做子女ke,oi聽爺ôi ke教示,假使當時挪亞ke子女m̀聽父言,無khiung-ha造舟,他teû ke生命敢做得保存mà?故所 ên-teû oi孝敬爺ôi;上帝也明確教示ên-teû:「應當oi孝敬你ke爺ôi.」

Ên-teû現下來想,上帝當時所賜pûn挪亞唯一免受洪水ke拯救法就係方舟,liá-ke係上帝親身所施下ke拯救,liá-ke拯救有關照到ên-teû得到ke拯救方法:

1.方舟在當時係上帝賜下唯一免除大水災ke方法,在現下,天頂ke上帝也賞賜ên-teû一ke得救法,就係約翰3:16所講:「因為上帝將獨生子,賞賜世間,pûn凡是信祂ke人m̀會沉淪,得到永生,祂愛世間到án-ngiòng.」故所 ên-teû只有依靠主耶穌,因為祂係ên-teû現下唯一免除地獄ke火lâu唯一ke救主;彼得講:「除祂之外,別無拯救,因為在天下人間無賜下別ke名,ên-teû做得靠耶穌得救」。敬愛ke兄姐,你有絕對信耶穌無?假使有chhin感謝上帝,m̀-ku,假使無,我liá下勸你,oi遽遽來接受主耶穌做你ke救主,絕對做m̀得像挪亞當時ke人譏笑上帝所賜下拯救ke方法,因為到末日時,你做m̀得自救,像挪亞時代,洪水氾濫,所有活物都淹死,ke時人也做m̀得自救,只有聽上帝ke命令進入方舟ke挪亞,一家八口lâu動物chang做得得救。故所ên-teû只有信靠上帝獨生子,將來就得到永生,m̀-sṳt受審判,就得救。

2.上帝有命令挪亞做窗仔,liá-ke窗仔係一ke,另外做在頂高,在liá有2、3點oi教示ên-teû:

A.窗仔做在頂高係教示ên-teû信徒做m̀得看顧世間,只有仰望天頂ke福氣,因為天頂ke福氣chang係真正上帝ke應允,係永遠,你假使只有看顧世間,就會失落lâu主相親密,自然將來你就無法度得天頂ke福氣,又假使看顧世間,心時常會受迷惑,環境做得pûn你失落信心,生出懷疑ke心,像馬太14:28~32所記,liá就係講,主耶穌ke學生彼得看四面ke環境,án危險得人驚,就隨時失落他進前ke信心來生出懷疑,故所ên-teû信徒只有仰天,信靠上帝,chang m̀-sṳt受世間一切ke環境來引誘ên-teû, 離開主到沉淪ke地方去。

B.窗仔做在頂高,第二ke教示係講:「Ên-teû信徒oi仰望領受唯一自天頂賜下來ke真光,liá-ke真光就係聖經。」聖經就係上帝ke話,祂ke話像光射入在ên-teû ke內心,做ên-teû ke光,照ên-teû一生所oi行ke途徑,故所ên-teû oi每日讀聖經,pûn上帝ke話時常在ên-teû內心,pûn ên-teû遵從祂ke教示來行,ên-teû信徒中有幾多人看、讀聖經m̀要緊,常藉故講chhin無閒,無時間來讀,m̀-ku ên-teû想聖經係mak-ke?聖經係靈性ke米糧,係ên-teû每一位信徒所做m̀得缺ke. Ên-teû必須oi看讀聖經像ên-teû每日食飯共樣,m̀-ku án-ngiòng,顛倒oi看讀聖經比食飯重要,因為讀聖經係食上帝所賜生命ke飯,pûn ên-teû ke靈性生活日日進步,lâu主越親近。假使你m̀讀聖經,你就像無食飯ke人,身體軟弱,心神疲倦,逢到種種痛苦,無法度得到平安,故所你teû每日定著oi讀聖經,一日至少也oi讀一章,免得ên-teû ke靈性退步。

C.窗仔做在頂高第三ke教示,就係喊ên-teû oi時常祈禱,求上帝幫助,祈禱對ên-teû基督徒係 chhin重要。又ên-teû ke氣力係對耶和華來,ên-teû假使oi得到氣力,只有祈禱上帝pûn ên-teû, ên-teû chang會得到氣力,又祈禱時係 ên-teû lâu上帝相親近ke機會,故所ên-teû做m̀得忽略liá-ke祈禱,教會團體ke祈禱oi參加,個人在間房ke祈禱也要緊,因為祈禱係在決定你ke成敗,一間教會ke復興lâu衰微都係在ên-teû祈禱ke程度,故所 ên-teû絕對做m̀得忽略祈禱。