《善雄牧園》

 | | | 轉寄

基督徒ke本質(2) (修訂版)

作者 邱善雄 2011.08.28

第二ke價值就係講「鹽本身ke能力係調和」，ên-teû知煮菜時都有放鹽，因為「鹽」做得調和pûn食物好食，假使煮菜無放鹽，雖然係山珍海味，也m̀合胃口，án樣，ên-teû做得知，鹽雖然係 chhin便宜ke東西，m̀-ku無論高官、工人、富貴、貧賤總係需要它，ku-só ên-teû做基督徒ke oi有虔敬ke心，好ke行為，來調和ên-teû四周圍ke人，pûn他teû看ên-teû好ke行為，另外需要ên-teû ke主耶穌基督，因為聖經裏有清楚指示，ên-teû最好ke見證法就係「所為」；ku-só ên-teû假使oi發揮調和力量，ên-teû就oi有所做為，做m̀得只有出一張嘴來講，oi有講，也有做，做m̀得只有來教會聽道理，聽了無所為，liá係等於空虛，係做一位辜負主ke基督徒，因為ên-teû無準照它ke命令。它在升天ke時m̀係有吩咐ên-teû講：「你teû去普天下傳福音pûn萬百姓」，ku-só ên-teû就勇敢將主拯救ke福音傳pûn màng信ke人，liá樣ên-teû ke教會chang會興旺，上帝ke國chang 做得擴展。照chhin多牧師ke經驗所講，最有力ke引導màng信者來信耶穌ke, 就係平信徒，ku-só我希望ên-teû某某教會ke兄姐，oi sat-mâng勇敢來背起主所交待ên-teû背ke十字架，ên-teû做m̀得抓liá-ke做見笑，因為主耶穌在馬太5:11所講，為著我，人chang辱罵你、逼迫你、誹謗你萬項ke壞，你teû就有福lè, ku-só ên-teû m̀-sṳt懼怕，只有傳主ke基督十字架ke道理，將來ên-teû就oi得到主所應允ke福氣。

又鹽ke滋味就像基督徒ke命脈，就係心中存有耶穌基督ke愛lâu在生活上存有基督ke公義，ên-teû知基督ke愛係無孔不入，它ke愛係做m̀得比ke,係比爺ôi、兄弟姐妹ke愛還大，ên-teû假使存有liá種ke 愛心，án-ngiòng ên-teû oi傳福音pûn人聽，他teû oi因為ên-teû無私ke意念lâu 愛心來承受，同時他teû也oi變成火熱一般ke心來愛主，遵從主ke教示，m̀-ku ên-teû oi記得一項，就係 oi引導人得救ke工作，m̀係只有人就做得到，定著oi有祈禱ke心，求聖靈ke幫助chang做得成功。

Ên-teû liá下已經知，做基督徒oi有像鹽ke本質來為主ke教會熱心做工，oi有基督ke愛，來彼此相愛，促進教會日日進步，ên-teû假使無liá樣做就會像ke鹽失味、無用，就oi pûn人丟在外邊受人殘踏（可能有人oi奇怪主耶穌，做mak-ke講鹽假使失味？鹽敢會失味nò？Ên-teû台灣ke鹽係m̀會失味，m̀-ku主耶穌所講ke鹽係指在猶太國所出產ke一種礦鹽，liá種鹽像石頭外邊一層ke鹽，ku-só猶太人使用鹽ke方法用布包，浸在所oi食ke東西，liá樣無久外層ke鹽就浸thet, 所剩ke就像石頭一般，就無用，只有丟在外邊pûn人殘踏，因為它已經失去鹽ke本質lâu能力，已經失味，ku-só主嚴厲講：「假使鹽失味，oi用mak-ke pûn它鹹，就係丟在外面pûn人殘踏。」Ku-só ên-teû oi常常反省ên-teû有盡本分無？有用真誠ke 愛心來lâu實際ke經驗來幫助人無？或者你有常常連結主耶穌，常常守禮拜無？你有真誠感覺教會有mak-ke工作必須你ke幫助，另外你有去做無？假使有liá樣做，就係你已經有發揮，你就係地泥hong鹽ke本性，對世上ke人chang有利益lâu價值，m̀-ku 係假使無liá樣做，你就會像鹽失味pûn上帝棄捨，看成得人惱 ke東西丟在外邊ke所在。