《善雄牧園》

| | | 轉寄

建造家庭祭壇 分享豐盛生命(修訂版)

人住在世上必有一ke歸宿,liá-ke歸宿就係家庭,家庭底背有yâ-ôi、姊妹、兄弟;如今已經少有大家庭組織,不論大或小ke家庭,都係社會最基層ke單位。故所,家庭生活影響社會;基督徒ke家庭生活也會影響教會,所以台灣基督長老教會總會致意推行要ên-teû每ke家庭建造祭壇,就係要ên-teû每ke信徒家庭舉行家庭禮拜,全家大細khiung-ha分享上帝所賜ke豐盛生命。

下背提供幾點pûn大家有心建造家庭祭壇ke兄姐參考:

1. 由誰帶領
假使全家信主ke家庭比較好辦,由一家之主帶領最適當,也做得全家人輪流帶領,ên-teû都係祭司。

2.定時定點舉行
養成固定習慣,像ên-teû食三餐樣仔。

3.家庭禮拜ke內容:
總會出版每禮拜發行ke家庭週參考手冊係最好範本,內容有詩歌、感恩祈禱、故事分享、讀聖經、討論lâu分享、代禱等。

4.家庭禮拜ke資料
聖經係唯一ke根據,其他做得配合家庭週參改手冊、台灣教會公報社出版ke新眼光手冊、靈命日糧等家庭、個人靈修材料在教會書房有盡多選擇。

建造家庭祭壇係基督徒家庭應看重ke靈修生活,藉著祂,做得pûn ên-teû ke信仰lâu生活更落實。也pûn ên-teû每一日分享上帝在ên-teû身上豐盛ke生命,從ên-teû自家ke家庭延伸到教會liá-ke大家庭,做得pûn上帝ke祝福從我屋家到萬民。