《客家消息》

| | | 轉寄

轉載:2019桃園客家文化節

  桃園客家文化節,今年he第五年le!八月三十一號第一場客戲巡演開演,續下來yû老屋系列活動、三坑稻草藝術創作大賽。九月七號ti新屋范姜老屋前廣場舉辦月光團圓音樂宴,全宴席tu用桃園在地食材料理。逐桌以兩千銀元ke優惠價格食得著,tui八月十九號當晝頭十二點開始,全宴會開放八十桌開放線上報名抽籤,歡迎大家來認桌。

  今年的「客戲巡演」,劇式豐富多元,八月底to十月由新樂園劇團、榮興客家採茶劇團、景勝戲劇團、松興戲劇團、偶偶偶劇團、銀河谷音劇團、紙風車劇團、山宛然布袋戲團、火焰蟲客家說演團,ti桃園市各區巡演,帶來九場生動演出,m̀-sṳ́報名,自由入場,誠心邀請民眾共下欣賞好戲。

  「老屋趣味導覽活動」he今年新增ke特色活動,挑選桃園地區國定古蹟——大溪李騰芳古宅ti 九月二十一號舉辦,導覽過程中精心安排生趣ke互動遊戲,pûn民眾認識客家珍貴ke歷史建築特色。「老屋音樂會」延續舊年老屋古風結合美妙樂音飄揚,今年邀請著客家流行音樂節得獎選手lâu客語創作歌手,十月六號ti平鎮王屋公廳演出,歡迎民眾前來品味客庄美好風情。

  為著響應環保lâu客家族群惜福愛物ke精神,十月十九號ti三坑老街舉辦「稻草藝術創作大賽」,鼓勵民眾報名參加稻草編織大賽,m̀單淨做得體驗客家傳統精神,還做得盡情揮灑創意。五to十人一隊,預計招收四十隊,總獎金達六萬五千元。Yû報名參加,就做得得著客家Q萌公仔ㄚ弟ㄚ妹家族撲克牌一副,老屋系列活動lâu稻草藝術創作大賽會陸續開放報名,敬請期待。

  八月to十月為期兩隻零月ke「2019桃園客家文化節」系列活動,包含4大主題、共13場活動,活動詳情請上財團法人桃園市客家文化基金會官網(http://www.tyhcf.org.tw/)查詢。