《客家消息》

| | | 轉寄

轉載:白馬名家宋屋學堂空間整建工程

  客家委員會主任委員李永得昨晡日(二月十五號)去高雄市美濃區,視察白馬名家宋屋學堂空間整建工程。李主委表示,期盼白馬名家整好後,做得發揮教育lâu文化各項功能,再展書屋風華。

  白馬名家he清末美濃下庄地區ke教育設施,對宗族lâu tai該片ke人來講,tu he當重要ke歷史空間,客委會識ti民國103年補助高雄市政府客家事務委員會辦理白馬名家ke調查研究,m̀-ko因為整修工程màng得著土地全部所有權人ke同意,故所美濃區公所一直mò法度申請補助lâu執行修復工作。

  李主委在視察後指出,liá-ha oi先做ke,就he搶救白馬名家現有ke建築,透過結構補強liá-teû方式,阻擋建築主體因為風吹日炙崩忒;ko-lòi oi請美濃區公所先向客委會提出整體規劃設計案,同時利用差m̀多一年ke時間,pûn土地所有權人tu同意簽署施工同意書,避免未來施工後發生爭議;包尾,oi請屋主、地主lâu區公所共下思考整建完成後,由奈隻單位管理,oi做麼个用途,pûn整好ke白馬名家做得永續經營,lâu當地居民共存共榮。

  高雄市美濃區長鍾炳光表示,tui人文歷史發展ke角度來看,白馬名家yû大高雄地區he罕得保存完整ke書屋建築,ko-lòi,創建人宋德昌m̀單淨yû貢生、下庄領袖、瀰濃庄首富liá-teû身分,還he右堆ke總理,故所pûn白馬名家成為美濃地區重要ke歷史性空間。Liá建築ke保存m̀單淨he宋家家族發展ke象徵,ya-he地方發展lâu教育文化見證,yû豐富ke人文背景lâu故事性,假使經過完善規劃復原,定著成為下庄聚落重要ke地標建築。