《客家消息》

 | | | 轉寄

轉載：2020東勢新丁粄節 「燈龍迷宮」提前感受過節氣氛

作者 2020.01.19

　　新丁粄節既經連續十二年得著行政院客家委員會列入「客庄十二大節慶」，也he全國唯一「大埔腔語系」ke客家節慶活動，歡迎大家來東勢體驗客家文化！

　　新丁粄，代表客家人ke米食文化，頭過屋家添丁，就oi ti正月半、舊曆十月中旬製作新丁粄，lâu kì疊高高敬拜天地、祈求細人仔康健，好好長大，liá-ha變cho台中東勢地區客家人過正月半ke特色。今年「東勢新丁粄節」會ti 二月八號、九號盛大展開，yû歡慶踩街、廟宇團體拼大粄比賽、新丁粄展示、客家特色產業展售liá-teû系列活動。

　　東勢區公所一月十七號ti鯉魚伯公公園舉辦記者會，展示六十斤大粄lâu客家傳統美食，宣布開展新丁粄節ke裝置藝術「燈龍迷宮」，pûn大家共下提前感受新丁粄節鬧熱氣氛。

　　東勢區公所講，「燈龍迷宮」ti鯉魚伯公公園展出，由三千隻客家彩繪燈籠布置做成，展期tui liá-ha to 二月二十三號，he在地彩繪燈籠老師指導社區關懷據點，加上各國中小學、幼兒園liá-teû師生共下製作，期望各式各樣ke彩繪燈籠lâu光環境裝置藝術做得成為東勢新亮點，siàng還啊多人來訪。

　　一月三十號me會邀請榮興客家採茶劇團，表演「開庄大戲－－討個哺娘好過年」傳統戲曲為新丁粄節暖場，二月八號、九號安排「歡慶踩街」表演活動，邀請在地表演團隊共下鬧熱，還yû「擲筊祈福求大粄儀式」，lâu拚大粄比賽、120斤傳統新丁粄展示。

　　主辦單位ya邀請在地藝術家、青年創作者、客家團體lâu社區媽媽教室ti客家文化園區lâu文化街設攤展售特色商品，希望pûn民眾感受藝術氛圍，活絡新丁粄節lâu地方經濟，相關訊息請看東勢新丁粄節網站(https://tcdssdb.com.tw/。