《李喬小說─孤燈》

 | | | 轉寄

四、雲lâu月(6)

作者 李喬 漢羅翻寫：李珊伶、劉敏貞 2012.07.01

　　簡陋ke軍樂隊，奏出ke進行曲，激烈ke管樂聲灌進耳公底背。她奇怪？照理樂隊已經演奏一段時間，m̀ 係嗎？司令台ke片，左片ke草黃軍裝，著馬靴佩帶戰刀ke, 定著係松本大尉；右片著鑲金邊高等文官服ke, 就係郡守。他teû mak-ke時節入來ke?

　　——「閱兵，開始！」森岡高聲喊：「啞斯——楣！球——嗞嘅！」

　　大閱官，還有一大羣大狗小狗，從右片男青年大隊ke片行過來lè.

　　——「卡息啦——覓其！」（向右——敬禮！）

　　——「拿喔累！」（放下）

　　——「卡息啦——覓其！」

　　鎮靜！定著oi鎮靜。她一擺又一擺提醒自家，m̀過，腳跟麻麻，膝頭直打抖索！

　　做m̀得án-ngiòng ! 妳還驚mak-ke？

　　看！禿狗！Ke禿狗頭生仔果然thèn在後背！

　　看禿狗吧，看到牠，妳就會有勇氣ke。M̀過liá下做m̀得看，ke就用想，用想ke來激起更旺ke恨火，用恨火助長妳ke勇氣！

　　——「卡息啦——覓其！」（向右——敬禮！）

　　來lè,真sṳt來lè, 到lè,下一ke就係。做m̀得！我做m̀得再遲疑！我開嘴就喊：報告大閱官！你ke狗少尉田內……

　　明基講ke: 不該忍ke, 一分一寸都m̀忍讓！Liá下就係做m̀得忍讓ke時節，我 oi狗田內ke命；我 ke命，還有肚屎底背ke, 也為明基——啊！明基……

　　右片！來lè,右片！就在右片四十五度角。她抽一口氣，闔tén目珠，猛地大喊一聲——呼喊ke 係變調ke敬禮口令：

　　「卡死啦——命給！」

　　「？……」

　　通過lè,通過lè, 眼前一片模糊。咦？Mak-ke? 我喊mak-ke? ……44度角，係45度了。

　　「拿惡——劣！」她完成第二道口令。

　　她ke圓身幌一下。眼前烏色lâu金色ke星星亂冒。她知。她知自家失敗。她oi哭。M̀，liá下 oi忍。M̀，再也m̀忍，就oi哭。M̀，還係oi忍！還oi忍？

　　——「分列式，哈饑昧！」森岡ke口令。

　　「喂！華子桑！樣仔？」小隊長問。

　　她轉頭，幌一下，表示無mak-ke. 隊伍該移動lè, 她緊緊發一ke口令。

　　「Liá係最尾一擺機會。」她深切ke恨自家。

　　還有五分鐘ke時間。三百公尺ke距離。機會就在 liá片。

　——「米去木給——時事昧！」她發向右轉行ke口令。

　　我蘇阿華，正經就án無用嗎！她緊緊ke咬牙，舌mà, 感到鹹鹹。

　　蘇阿華啊蘇阿華！妳正經án無志氣？無勇氣？想想吧！想想歸個事況……

　　「再忍吧？」

　　「呸！無羞恥ke藉口！」

　　「Má人講ke? Liá係不得已！」