《李喬小說─孤燈》

 | | | 轉寄

四、雲lâu月(1)

作者 李喬 漢羅翻寫：李珊伶、劉敏貞 2012.05.27

　　昭和十九年(1944年) 4月1日，台灣總督府創設二年制ke「青年學校」，計劃幫助增加訓練基層軍事幹部ke速度。4月3日頒佈：「台灣青年特別練成令」。4月4日地院檢察官宣告：「戰時諸犯罪，一律視為敵人嚴辦」。4月11日，實施「全台要塞化」……

　　看來，在「輝煌戰果」ke掩飾下，真實ke戰局，好像一日比一日更嚴重更不利。

　　Liá日，係大湖郡男女青年大校閱ke日仔，由郡守陪同附近駐軍部隊長松本大尉，擔任校閱官。

　　阿華緊在等liá個日仔。

　　過去ke四隻月，在阿華來講係一連串ke夢魘，更係煉獄煎熬ke日仔。

　　她想過無數種ke方式、方法來解除liá個山怨海恨lâu椎心切痛。

　　當然，其中包含了死，各種不同ke死法。

　　M̀過，最尾liá-teû都決定放棄。死，太簡單，太便宜。因為，便係一了百了；她m̀甘心就án-ngiòng一了百了。

　　她oi採取死之外，更難，更深遠ke方式。

　　在她決定ke時節，她當驚訝，她本旦m̀知，大家都認為，自家也承認——她係一個怯懦軟弱，堵到事情單淨會流目汁ke細妹仔，想m̀到竟然做得下定決心採取連自家都無má敢相信ke手段。

　　她擔任「婦女訓練團」ke中隊長。

　　她所指揮ke 係「永田中隊」——用她「永田華子」liá個日本名仔命名。Liá係一種「榮譽」。

　　——台灣人改日本姓名，在昭和十五年(1940年) 6月13日批准71人開始。阿華ke蘇姓，係去年八月改做「永田」。阿爸ke意思係：他喊永寶，耕田係蘇家祖傳家業；改姓「永田」，多多少少還算無完全放thet所有ke意思。

　　「為了討生活，祇好改。」老阿爸係án-ngiòng講。

　　「Liá一改，分配ke砂糖，豬肉，鹹魚都增多啦！」老阿姆講，阿哥阿嫂也án-ngiòng表示。

　　為了liá件事，明基表示當m̀歡喜——劉家絕對m̀改名換宗，liá係老阿姆鄭重決定ke.

　　「永田華子，係他teû ke ;蘇阿華，係你ke,做得無？」

　　「他teû 係má人？」

　　「阿爸阿姆嘛。」她面兇兇ke 看明基一眼。

　　M̀過，「阿華」，在他明基出征前就「死」了，活下來ke 係「華子」ke身體。

　　不幸ke 係，阿華ke心，共樣寄託在華子身hong; 阿華lâu華子係做m̀得共下存在ke.

　　經過幾個月ke掙扎，最尾總算決定：阿華oi推動華子ke身體，去完成阿華ke願望。

　　阿華在明基出征後，目汁就漸漸燥thet; Liá下，她已經m̀識流目汁。

　　華子ke肚屎，已經相當明顯ke突出來；束腰ke寬布帶，一日比一日更需要用力纏綑。

　　她完成束腰，著好白上衣，黑「門背」（燈罩褲）；在離開間房前，她伸手在心愛 ke書本，衫褲，眠床lâu 被hong摸來摸去，pûn手掌去感覺liá án多年來自家用過ke東西……liá一去，係向ke má人也m̀知得ke命運挑戰啊。