《李喬小說─孤燈》

| | | 轉寄

三、海天萬里(13)

  M̀過「旱雷」真識惹禍lè. 甲長大人竟然昂然下令:馬上lâu兩擔蕃薯扛去大湖街,到「特高係」報到。

 「特高係」,係「郡」所屬警察課下直轄ke安全偵察單位(庄役場隸屬郡庶務課;庶務課lâu警察課同級);故所單淨有重犯chang會由「特高係」直接處置(一般違警,從派出所或者駐在所處理,在州一級底背另有經濟警察課承理);因為「經濟犯罪」在目前係嚴重問題,liá種蕃薯「雅密」(黑市),由郡警察課特高係巡查稽瓣。

  「好吧。Ke就去。」阿姆顛倒淡然:「阿青,看緊明成;他亂講亂來,可就oi尋你。」

  「Ke,我teû喏?」三個無買成蕃薯ke人,嚇得面青青。

  「你teû轉去好lè, 等分所傳你teû再去。」 

    「Ên共下去吧。反正……」

  「樣仔?」

  「反正躲m̀ thet!」

  「對!Ke,你teû就去,m̀過千萬莫鬧。」阿姆講:「Liá係大局,做m̀得lâu大局對抗。」

  「明成,答應我,做m̀得亂來。」

  「媽,m̀會啦。」四十零歲ke大男人,在阿姆面前,還單淨oi乖乖:「阿姆m̀好譴,我,我會聽大哥ke吩咐啦。」

  「Ke就去,最多皮肉之災án-ngiong.」阿姆寬慰他teû兄弟。她無再看甲長一眼。

  「唉!我 liá甲長也係不得已啊。」陳乾m̀自在:「何況明成他,又án無規矩。」

  阿姆無回答,還當自然ke lâu眼光轉到另外一ke方向去。

  她忽然間迫切ke想起屘子明基來。明基ke性格lâu三個哥哥都m̀相同,ke係兩個極端性格ke匯合:有時節衝動暴躁,像pûn捉到ke台灣山豹;有時節理智冷靜,就像山中ke老僧。

  奇怪ke係,大家熱切關注ke事,明基漠然m̀問;大家m̀理會ke事物,他又可能熱烈查問,樣仔也m̀放棄。

  今晡日liá場糾紛,明基會像大哥,還係二哥喏?

  從明基,她ke思緒又跳到阿華身hong.在兩兄弟懷tén一萬個m̀甘心,一千個心焦焦,推開籬笆門,oi離開ke時節,她交代明青講:

  「事情了thet,順sa到永寶屋下看看。」

  「看永寶……係講去看阿華嗎?」

  「嗯,順sa——自自然然。知無?」她盡量表現出無mak-ke事ke語氣態度,減輕明青lâu明成ke緊張恐懼。

  同時m̀知樣仔,她有一ke幽忽,隱約ke感覺,也做得講係預感:阿華,liá個女孩,好像oi生出mak-ke事端……