《李喬小說─孤燈》

| | | 轉寄

三、海天萬里(7)

Liá日,盥洗用水緊配m̀上來,中餐到啦,謎底也總算揭曉:朝晨配發淡水一杯,洗刷使用,或者做「飲料」充饑也好,當晝一人一碗淡粥;其它,全部減少!   

「驚真sṳt會餓死li!」   

「唉!死了,或者更好!」   

彭永輝所屬「勞務團」ke人員,在「鳶丸」艦hong有四百人,liá四百人全在底艙底背。   

瀰漫重油氣味,潮濕鬱悶ke底艙,前後長56公尺ke距離,單淨有頭尾lâu中間三隻弱弱ke燥電池ke細電火珠仔;還oi 在hong床、食飯ke時間chang會放出光芒。   

一開始係身hong ke汗臊,吐出ke穢物,還有重油混合ke氣味,以後加上便溺ke臭味;在食物飲水急促減少之後,便溺ke臭氣轉淡,最尾,瀰漫艙中ke係濃稠稠又酸又澀又苦還辣ke奇怪氤氳。   

大部分人又開始吐;liá擺吐出ke 係有teû泡沫,或者幾滴苦水。   

有人吐之後,引起歸身ke痙攣;激烈ke痙攣又引發腸胃食道ke抽搐,án-ngiòng又大吐特吐-m̀過係單淨吐ke聲,還màng 吐出mak-ke, 單淨係撕肝裂肺ke吼叫。   

最尾,liá個人安靜下來了,一直到分發稀粥ke時節,也還眠在ke片!   

「Liá人喲!無氣啦!死了!」Liá下chang pûn人發現。   

屍體pûn拖出去,馬上拋落海底背-「海葬」。   

第三日,又死了一ke, 第四日三個,第五日……   

M̀知mak-ke時節開始,所有人員都全身無著衫褲;有幾個係歸身光溜溜ke,大部分人在跨下前後圍tén一片手巾,lâu腰圍ke手巾成丁字形;liá就係日本人oi用ke「糞多西」(犢鼻褌)。   

船艙底背,m̀-sṳt ko有交談,也m̀-sṳt ko行動;甚至ke呻吟聲也漸漸消失。   

就án-ngiòng恬恬ke, 慢慢ke有teû人進入半昏迷情形,有teû人意識朦朧像在幻夢底背;有teû人ke意念縮成孤單ke一細點,或者細細ke一條線;生ke自覺也化為點點,或者細線……   

船身,下擺仔會激烈ke搖晃幾下,艙壁時有鈍重撞擊ke震動lâu聲響,也好像有沉沉ke砲聲,爆炸聲。   

M̀過,lia2teu5離他teû都十分遠;戰爭也係,故鄉也係,爺ôi兄弟也共用。   

「假使……m̀知nai一日,liá隻黑船lâu ên載轉台灣,ke正妙喏!」永輝有了奇怪ke盼望。   

哈!還做liá個美夢!真可笑。   

「阿無……載到地獄去,嗯,一片烏烏ke地獄。」   

其實,liá下liá片,m̀就係一種地獄?   

「唉!還係 m̀好án-ngiòng想。」永輝當心疼地解放自家:「我oi振作起來,因為我定著oi活tén轉去啊。」   

阿貞含情又幽怨ke模樣兒,當困難ke, m̀過當完整ke浮現腦際。   

阿貞係一個性仔當烈ke細妹人,m̀過有時節當脆弱,當容易流目汁……   

「細人仔喏?」他又想起ke紅通通軟糊糊ke小阿美。   

有時節,他會想:細妹人係當奇怪,妹仔係當妙ke. 他明白自家係一個粗野ke鄉下人;像大赤牛án野,像苦瓜皮án粗;有了細妹人,特別係kiung了妹仔以後,他幾pái發現,自家開始認真想事情了,想得又多又細,又深又遠。自家好像改變當多。   

他模糊ke知得,ke係一種力量,細妹人,妹仔pûn他ke力量;m̀過也帶pûn他有teû「損失」,他ke膽仔開始變細,顧慮一日比一日增多。   

膽子變細,係當好笑ke; 他越來越驚死了。驚死,pûn人懦弱,m̀過,也會教人產生求生ke意志。   

Liá下,他係堅決ke, 十分頑強ke咬定一點:除非萬一船仔破thet,或者pûn炸死,ke就無話講;阿無,我定著oi撐落去,我絕對m̀甘心就án-ngiòng pûn折騰死thet.   

Án-ngiòng一想,會試tén當快樂,因為,以前自家想m̀到án多ke;自家好像並無án憨啦。