《李喬小說─寒夜》

| | | 轉寄

變(6)

  苦旱ke日仔,緊延續到五月。

  龜裂ke山田旱田,菜園苗圃,丘陵淺山ke農作物,野草雜萊,甚至在有兜孤植散生ke灌木,也都既經枯死多時。放眼望去,河壩lâu高聳ke禿巖全he灰白色ke;大半隻原野,呈現一片灰褐色。

  五月節過後,總算降了一場甘霖。

  Yi像來得忒慢了。M̀過,乾硬碎裂ke大地一經雨水ke滋潤,落葉底下,枯樹根項。Mò幾日就又冒出淺淺ke青點。

  「有救了!」大家透了一口大氣。

  蕃仔林ke各家各戶,男女老嫩還kha mò閒起來。

  該時,彭屋就顯出嚴重ke人手m̀-la了。

   Liá時節,人興嫂阿枝仔肚挺挺,就oi臨盆生產了。

  大憨漢人興又歡喜又緊張;他知liá樁事情,自家mò辦法then-sú mak-ke,故所只有還kha拚命做事。他he一條大赤牛,風吹雨打,冰凍日炙,挨餓勞作,加上阿枝仔豐滿ke肉體像火熱情,異像都打m̀倒他磨m̀損他。

  當然他緊試著腰拑背吊,但he他想出一套解除疲累ke妙招。該就he目珠sap等來想得人惜 ke阿枝仔,想阿枝仔肚屎底背ke細人。另外,他總he想起該年老ke阿爸阿媽,想起彭屋諸多ke 不幸。Án-ngiòng他又精神抖擻,他又做得mò日mò夜ke做事。

  自從入贅許家以後,他ke心事意念越來越單純了……自家既然既經擁有阿枝仔,該就一切都既經滿足。他oi為阿枝仔竭盡一切。M̀過,ti承受阿枝仔醉人ke笑顏時,ti溫香滿懷欲仙欲死時,心頭該點酸酸ke東西卻隱隱蠢動,該就he對爸媽兄嫂ke疚愧……

   Án-ngiòng,他苦苦思索,看做得做m̀得為該家盡點心意。有一日,他總算想出來了。暗晡頭,ti眠床項他lâu自家想做ke同阿枝仔講。

  「Ngài想,ngài……m̀知妳會譴mò。」話講出口,心肝肚卻對自家十分不滿意。樣oi問她會譴mò?他緊緊講:「Ngài想同妳講……」

  「Mak-ke嘛,阿興,看你mò頭mò腦!」阿枝仔瞠他一眼。