《李喬小說─荒村》

 | | | 轉寄

二、多少恨昨夜夢魂中 (4)

作者 李喬 漢羅翻寫：劉敏貞 2009.09.06

在阿漢進入大南勢—蕃仔林之南，新ke「蕃界」—做隘勇ke年年初，兒玉源太郎上任台灣總督府，後藤新平任民政局長，tui liá日政府開始實施領台後第二階段ke鎮壓政策—徹底消滅反抗勢力。

故所，再一pái實行「民情」過濾，liá年十一月五日發佈「匪徒刑罰令」。

第二年，明治三十二年(1899)，全省潛伏ke反抗義民大量pûn人搜捕；自動出降ke義民也m̀少。

台灣總督府為到更深入清查可疑份子，liá一年八月起開始採台人當「巡查補」(至於台人任「巡查」係在明治四十四年(1911)十月以後)，從liá台灣籍ke「三腳仔」正式誕生；在台義民pûn人逮捕處死ke有一千零人。

*光緒三十一年，明治二十八年，設「保良局」清查反抗台民。次年八月一日舉行全島戶口調查。明治二十九年二月三日，日政府另第63號法律公佈：台灣總督於其管轄區域底背，做得頒發有效力法律ke命令獄。Liá就所謂「六三法案」。日政府允許台灣總督在台灣實施獨裁極權政治。自從台民「依法」淪入烏暗地獄。「匪徒刑罰令」就依據「六三法案」定般ke。見台灣省文獻會出版「台灣省通誌稿」大事記第一冊。

Ke一年ke中秋節前一日臨暗，khiung-ha在做隘勇ke謝阿潭帶轉一ke口信：阿漢m̀轉來過節lè. 早先阿漢係講oi轉來ke.

「因為有人發病，阿漢調班輪值，故所行不開。」

Liá係常有ke情況，m̀-ku, 燈妹總感覺怪怪ke ;心肚有一股奇異ke不安感。

果然，節後兩日謝阿潭返防後，彭家細郎，阿漢ke至交好友黃阿陵lâu她講一ke「傳說」:阿漢在大湖警察所拘留好幾日lè.

「啊？真，真ke ?」一陣暈眩，她幾乎會昏thet.

「阿潭嫂lâu順妹講ke, 阿潭講，m̀ oi pûn你知。我想，還係m̀好瞞你chang對。」

「他，他為，為mak-ke ?」她ke方寸全亂lè.

「我天光日就去探看na.」

黃阿陵無探出mak-ke. 過lè兩日，下晝日頭西斜時分阿漢sa施施然轉到蕃仔林屋家。阿漢想將事情全隱瞞下來，m̀-ku lâu她四目相接時，阿漢愣住，他tui ke憂苦焦急ke眼眸中看出她已經得到消息。

「哈！一ke細誤會，無事lè,無事lè.」阿漢裝作無事樣仔。

「......」她盯住他不放。

「爸！阿爸！」細明青會喊阿爸lè.

「我pûn一ke陰險細人咬一口。現下無事。」

「......」她搖頭，還係盯tén阿漢，m̀-ku阿漢ke模樣逐漸模糊lè. 因為目汁四溢，chhin 遽就氾濫下來。有時節，她係一個目汁特多ke婦人家。

阿漢透口氣，lâu事情ke經過講出來：

七日前，阿漢用繩索圈套抓到一隻肥碩ke菓子貍，六斤零。過節會到lè,做得拿轉屋家pûn屋家人飽食一餐，m̀-ku幾個傢伙要求他留下來大家享受享受；他m̀答應，有人還有翻面ke意思。

「做人，莫做án絕啦！」姓徐ke講。

「大家湊錢向你買，你又何必？」姓張ke講。

「劉阿漢，就án-ngiòng m̀講交情啊？」

講話ke係酒鬼尤春木。尤係當阿漢在南湖做隘勇時ke老夥伴中，今晡日唯一留下來ke一位，也係最照顧阿漢，又時常請阿漢飲酒ke老光棍。現在他也liá樣講，阿漢就只好認lè.

「好吧，m̀-ku我m̀賣，你teû出酒，大方『打鬥趣』吧。」阿漢講。

「好！今暗晡ên-teû 飲五加皮！」

「劉阿漢你m̀就太食虧lè嗎？」

「在liá, 我時常白飲大家ke酒？」

「嘿嘿！劉阿漢也大方起來啦！」

「呵呵！ke ên-teû就出雙鹿五加皮吧！」

看大家摩拳擦掌，興高采烈ke樣仔，阿漢也展眉而笑lè. 阿漢向來m̀係一個容易快樂ke人。

Liá係一餐盡情又食又飲 ke「打鬥趣」。秋天ke菓子貍肉，肥肥嫩嫩ke, 鮮美極lè, 配上濃烈香醇ke雙鹿五加皮，做得講它teû係人間第一美味。阿漢除thet石斑魚並m̀愛野味，liá一兩年間sa不知不覺間愛上飲酒。阿漢m̀係一個酒徒，他好半酣ke醺然，他中意酒後ke悠然自在。

「加飲teû,更飲一sit.」他想：「我ke菓子貍六七斤nò.」

Liá暗晡，阿漢lâu其他四五個人共樣，飲卡多yit-sit ;他飲到半酣後又再多飲一sit.

他teû起初係五個人，後來好像又多兩個人。新來ke人好像還帶來一大碗公炸好ke「石斑魚」nò, 嗯，炸石斑仔係下酒ke妙品lè. 嗯，再飲一sit.

M̀,好像有個生份人在khiung-ha飲酒。M̀, m̀係生份人，只係脫下隘勇衫換上官服定定。Liá-ke人喊余兆貴吧，係大南勢唯一ke「官仔」—無一久前受訓出來ke「巡查補」。喔！係「巡查補大人」lè ! 官廳交代ke, 大家一律oi恭稱他teû為「大人」。吧，余兆貴係一個平易和氣ke「大人」，ke請他飲 teû, 也係應該ke.

「余大人，我，我劉阿漢敬你！」阿漢口齒有teû無清楚。

「多謝，乾，樣仔？」大人講。

「乾，做m̀得，我半杯，大人乾。」

「Oi乾，khiung-ha乾！」

「我，我無法度lè......」

「喲！劉阿漢án-ngiòng啦？」姓張ke起鬨：「他係海量！」

「你亂講！我......」

「咦？Liá一帶ke好漢哪，今暗晡樣仔啦？」

「我看，他......」酒鬼尤春木sa有介事ke翻阿漢ke眼皮講：「他真實做m̀得飲lè.」

「哦？酒鬼你護他？你teû老交情果然無相同！」

「係嘛！我teû係同生死過來ke，樣仔樣？酒鬼真實醉lè：「我替他飲，總做得吧？」

「做得m̀-ku, oi擋，ke就三杯！」

「三杯就三杯！」酒鬼猴性起lè.

「好啦，還係我自家飲吧。」阿漢緊緊拿起杯仔，猛一仰首，咕一聲乾了一杯。

「了得！果然了得！」

「呵呵！當然啦，我liá-ke細兄弟，你teû知嗎？」酒兒一ke踉蹌，幾乎撲進他懷裏：「他，一口氣，三顆，知嗎？幾杯五加皮，算得mak-ke ?」

「你講係？係......」問ke人手指額頭，做「刺紋」ke手勢，ke係指出草蕃仔頭ke意思。

「M̀係，係，嘿嘿！」

「喂，劉阿漢，酒鬼，你teû參加過馬拉邦ke pái—對無？」忽然有人liá樣問。

「當然，樣仔樣？像你teû ?哼！」酒鬼竟直認不諱。

大家係飲a馬尿做美酒啦。話頭居然講到「馬拉邦」剿弒「黃頭兵」ke故事上來。

「哦！他teû參加lè嗎？」好像係余大人在問。

「嗯。故所，我teû都講他teû, 係好漢，英雄人物！」

「喂，尤，尤春木，你，有無弒他teû ?......」

「我？嘿嘿！好像係有，有啦。」

「無！酒兄只會飲酒，他樣仔敢！阿漢講。M̀知為到mak-ke, 對於酒鬼有一份厭惡。

「Ke,阿漢兄，三個？嗯？」

「無，我也無......」阿漢講。

「不。三粒。係ke確確實實ke三粒頭nà, 呵呵！咄！咄！咄！就liá樣......」酒鬼在比手畫腳。

「真實嗎？劉阿漢兄？」不知má人問。

「無，無啦！他胡亂講！我mak-ke都無。」他講，他ke心頭還清醒tén.

Liá-teû傢伙，你一句我一句ke, 好像問阿漢有ke無ke, 還oi阿漢表演弒人頭ke動作。阿漢開嘴大罵，大笑，後來又哭起來。他teû都來安慰阿漢，koái阿漢，還有pûn阿漢搥背捏肩筋。

呵呵！真有意思。他teû又好像問有ke無ke, 阿漢都胡亂應。後來阿漢實在支持m̀下去，眠下去無一久就mak-ke都m̀知lè. 阿漢醒過來，係第二日破曉時分。在他身旁，酒鬼lâu姓張ke兩個人還睡a死死；其他ke人已經離開。