《江嵐客家文學專欄》

| | | 轉寄

八月半情事

  打早hong床,朋友寄一隻大月公在電腦肚pûn ngài過中秋。

  心情當好,行到窗仔門前,拉開窗簾,天邊ke烏山嶺又出現在眼前,因爭昨暗晡落大雨,雷公大到驚死人,一隻聶爧(ngiap lang)lâu烏闍闍(tu)ke天地照醒,跈等一響大雷公,險險lâu屋頂打必忒,天頂打爛一隻大孔,天頂ke水漏到叉叉滾,屋簷水四下流,像水沖樣仔,lâu一隻屋kièm揫揫,盡像公園肚ke噴水池,人在屋肚,心肝慌慌mò安定,歸間屋像會落(lap)下來樣仔,還難耐!

  嘉南平陽,自新曆九月起勢就pûn濛沙煙食忒ke山色,打幫昨暗晡該陣大雷公雨,今晡日做得還(vàn)ngài浸青ke山色,心情一路驫到天堂,當想就企到這位莫停動,看吾ke山想吾心肚ke大月光。

  昨晡日,音樂家朋友佳蓉來過,屋肚還留下調皮m̀肯睡目ke音符,ngài兩儕總he會討論佢這駁仔噴橫笛ke心得,還會共下欣賞古箏ke音樂,mò論he古典ke也he現代ke曲調,合意同mò合意ke表現手法,me會講著客家音樂ke發展,ngài兜盡欣羡老底ke客家人,山歌遛天,歌聲又高又亮,對這隻山頭唱過該隻山,仰會有恁大ke聲頦,實在還厲害哪。佳蓉he一位盡有智慧ke婦人家,教ngài盡多做人ke道理。佢oi來尋ngài ke時節,畫家采諭搭佢一盒月餅,帶來故鄉ke味緒,月餅肚項m̀ he包豆沙卵黃,me m̀ he蓮蓉火腿,鹹鹹ke月餅一等生趣ke感覺,肚項包ke he家鄉ke鹹菜,食一口,目汁就跌下來;鹹菜!鹹菜he ên客人最實疊ke生命之源,包落月餅底肚ke he仰般ke心情,食著鹹菜月餅ke人,he m̀ he同ngài共樣會感動到跌目汁?雖然流浪到他鄉,在西拉雅柚仔樹下,還做得食著朋友用心特製ke鹹菜月餅,恁仰ke相惜,恁仰ke貼心,oi用仰般ke文字來形容正貼意?這he ngài食過盡好食ke月餅,有醲醲ke故鄉泥沙味,親切同燒暖共下落肚,he幸福pûn人相惜ke味緒。

  來到西拉雅柚仔樹下,受到多多台南人ke相惜,阿香姐同阿玉姐ke照顧,還有盡會相惜ke玲容先生,田竇肚種有一息麼該就定著會pûn ngài一息食香,菜瓜、蕃薯葉、柳丁同酪梨,霜降以前收成ke大白柚飽水又甜,盡特別ke he麻豆最出名ke文旦,八月半食月餅,香香酥酥ke月餅,加上水份飽足ke文旦,肉質細膩(ne)幼路,甜後回甘ke麻豆文旦,he台灣一等好ke柚仔,白露進前摘文旦一等mò閒,盡有福氣,做得同這垤土地結緣,同佢兜熟識he這生人盡靚ke緣份。

  M̀盼得離開窗仔門,驚怕一走腳,山會m̀見忒,細妹仔為ngài泡一杯冬冬送ke「古坑濾泡式咖啡」用大妹仔特別擇(tho̍k)ke海芋花咖啡杯仔,啉起來脫體合味,有細妹仔ke燒滾水又有大妹仔ke心意,冬冬ke古坑咖啡有盡純ke台灣土質,香香醲醲ke本土味緒,還有賁賁ke人情在肚項,he兩ke妹仔ke孝心同誠意,吞落肚ke he又香又溫暖ke燒氣,該燒暖流到每一條血管,每一條神經,喊醒八月半ke思鄉之情。


  月光華華,照亮柚仔樹下ke人影
  月光華華,照亮心肝肚ke烏暗
  月光華華,照亮遊子ke笑容
  月光華華,照亮老屋爺哀ke思念
  月光華華,照亮八月半ke禾埕
  月光華華,照亮親戚朋友燒暖ke喊聲
  月光華華,照亮每一間屋肚ke溫暖
  月光華華,照亮全台灣人ke好笑容

  看月華,食月餅,管得佢he大雷公也he做大水,窗仔外he烏天暗地也he好陽光,心中ke日頭出來正he溫暖ke日仔,心肝肚月光華華就使得照出一條光明ke路。

  2007/9/25中秋在西拉雅柚仔樹下