《江嵐客家文學專欄》

| | | 轉寄

打造精緻ke心靈

  San總he嫌ngài ke生活品質mò罅精緻,輒常oi買兜精緻ke東西pûn ngài,這兩日對台中轉來台南看ngài,看著ngài使用百貨公司送ke杯仔啉咖啡,m̀聲m̀響買來一組,海芋青翠葉花圍等白雪雪瓷盤項ke,咖啡杯組送ngài。

  朝晨五點零,窗門背一片濛沙煙,西拉雅ke天時當特別,逐年五月到十月he雨季,乜he天時盡明朗ke時節,差m̀多逐日都做得看著烏山嶺,大約九月起勢出現濛沙煙,逐日都oi在濛沙煙肚項,除非落一場大雨過後正做得看著山景,這段時日he ngài盡難耐ke時節,看m̀著山,會pûn ngài mò安全感,心肝肚就像失忒偎靠ke肩胛。

  今晡日朝晨hong起來,用San送pûn ngài ke咖啡杯泡佢特選ke古坑濾泡式咖啡,一片品嘗等燒暖香醇ke原味咖啡,一片看等窗門背mò邊mò際ke柚仔樹,白露正過,文旦全都採收忒哩,賸下來包等紙袋仔ke he白柚lâu西施柚,白頭翁日日準時來叩玻璃窗,吱吱喳喳ke屋簷鳥歸群共下絡食,逐日都聽得著佢兜fûn享ke歡喜,摸等咖啡杯盤ke感覺,精緻又幼路,一蕊一蕊ke海芋盛開在杯緣盤底,翠青ke枝葉伸向海角天邊,等ngài輕輕放下帶耳ke咖啡杯時,杯盤叩出ke青脆聲浪,he San餳人ke呼喚,一聲聲:「媽媽,媽媽!」(mì-la6 mì-la6)有節奏ke使妮聲,he佢叩人心弦特別ke藝術歌韻。

  2005年he ngài多災多難ke一年,該年生日,佢摟淨所有ke貯金,買來一粒鑽石禁指pûn ngài。該年佢正大學二年,半工半讀ke佢,除忒逐擺領月給ke時,定著oi先lâu學費貯起來以外,賸下一息仔ke月給還oi支理自家ke所有生活開銷,打工ke薪水當低,根本就mò麼該罅應付自家ke日常生活,佢硬殼ke個性,對讀大學起勢,就mò lâu屋家拿過半角銀。等ngài收到厥禮物ke時節,目汁對面項流等下,San真經he一個憨細人仔,其實,知妳有這份心意,ngài就當滿足矣,ngài一向合意自由,mò oi物質ke牽絆,故所吾ke生活中,除忒生活上ke必須品以外,差m̀多都mò麼該奢華ke藝術品lâu收藏。921大地動在台中,搖到天翻地轉,幾多ke缶仔水晶、琉璃木雕藝術品,一個一個對廚窗架棚頂搖落下來,跌到粉碎。921續變做吾人生當好ke教訓,對該央時起勢m̀識再買該兜身外之物,生活用品乜變到當簡單,物慾少矣,人,顛倒輕鬆盡多。後來發生家庭變故ke時節,正做得淡然處之,接受簡單ke生活。m̀過ngài共樣盡感動同感謝妳這份心意,恁仔細。

  San he一個真誠ke細人仔,佢用盡所有ke存款lâu ngài買ke禁指,ngài he mò戴,佢會艱苦,對這下始勢ngài身上又多一個負擔,這份親情同保管ke責任,收著禮物ke當下,除忒目汁濫泔以外,較多ke he pûn人心碎!佢講:「媽媽,這兩年妳受著恁多苦難,ngài m̀知oi仰般lâu妳幐手,這隻細細ke禁指希望做得代表吾ke一份心意,希望佢做得照亮妳ke心靈同前途!」天啊!在吾心肝肚靈秀ke嬌詩女,幾時曾經,就在一夜之間變大人吔,做得體會同分擔阿姆ke心情,這隻禁指一定oi ngài戴在手項,日日面對審視ngài牽掛ke親情,該閃閃發光ke,m̀ he吾ke裝飾品,該he吾心靈深肚ke一粒堅硬到m̀會溶忒ke目汁,逐擺講起,ngài都會講:「該m̀ he鑽石,he一粒目汁。」逐日看著就心痛,佢接下來ke日仔,he m̀ he oi縮衣節食,有一餐mò一餐呢?