《江嵐客家文學專欄》

| | | 轉寄

圓一隻尋根ke阿姆節(1)

  阿姆he一個當念舊又當煞猛ke人,今年報考行政院客家委員會,舉辦ke中高級客語認證,佢有閒ke時節,就緊放CD,嘴me跈等緊唸,一隻字一隻字學通用拼音,看佢恁多歲仔還恁煞猛,當認同自家ke族群,me盡關心客家教育,佢總he當遺憾,在這離開胞衣跡二百公里遠ke嘉南平陽,盡少堵到客人,mò人做得同佢講阿姆話,看佢恁認真準備考試,pûn ngài盡感動。故所,今年ke阿姆節,想oi陪阿姆轉去看姐婆ke胞衣跡同阿姆ke故鄉,解一下思鄉ke心焦,姐婆ke胞衣跡在台中后里,阿姆ke故鄉在苗栗銅鑼偎三叉ke所在,這ke提議,對阿姆節這隻日仔來講,he盡有意義ke議題。

  陪等阿姆對台南開始坐車,換四枋車正轉到姐婆ke故鄉──台中后里,該he一個細細ke舊鄉鎮,對ngài做細人仔該央時,就生來恁樣,mò麼該改變,較大ke變化he姐婆同舅公、姨婆都mò在矣,盡惜ngài-teû ke表姑阿琴姑也在幾下年前來過身,這件事情對ngài-teû家族ke打擊當大。阿琴姑he大家ke守護神,無論家族內ke大細事項,全都he阿琴姑在該安排,姑丈he公務人員,阿琴姑一生人盡大ke希望,就he看著姑丈升到站長ke時節,今年姑丈升起來做站長矣,圓矣阿姑一個盡靚ke夢。舅婆含等目汁講:「若姑等一生人ke夢想,這下看m̀到矣。」ngài挲等舅婆ke背囊,安慰佢講:「舅婆,阿姑知啦,he阿姑保庇姑丈升起來做站長ke。」舅婆聽到ngài恁仰講,當歡喜,緊搭吾ke手緊點頭,正開始有一息仔笑面。

  舅婆牽等ngài去散步,m̀知he麼人牽麼人。行路去月眉糖廠,過一條圳溝,斡(vat)一隻斡就到矣,這位有一間伯公廟,舅婆在伯公廟前停下來,雙手合掌拜伯公伯婆,佢同伯公伯婆講:「這係阿細妹ke妹仔同外孫女仔,今晡日特別轉來嫽,請伯公伯婆愛庇佑佢兜身體健康,一切順序。」吾姆聽著舅婆恁仰講,目汁一下就流下來。吾姆me當曉得,遽遽拜伯公伯婆:「伯公伯婆在上,請保庇吾舅姆,身體康健,一家大大細細,歡歡喜喜過日仔。」佢倆儕就像倆子哀樣仔,恁會相惜。阿姆牽等舅婆ke手,行過糖廠ke冰店,舅婆緊講愛請ngài-teû食冰,舅婆像細人仔樣仔當生趣,阿姆買麼該分佢食,佢就食到有搭有碓,麼該就mò揀食,連月眉糖廠盡出名ke紅葡萄酒,舅婆me m̀驚醉,一杯又一杯緊飲,實在還得人惜哪!

  舅婆講,舅公在這糖廠食頭路食到退休,故所舅婆朝晨暗晡,較mò日頭ke時節就會來這行行矣,歸路人都同舅婆相惜問,又問講:「這倆儕he若親戚he-mò,罕得看著哦!」舅婆都當沙鼻大大聲同人講:「這he阿細妹ke妹仔同孫女仔啦!」對方就親匿匿(chhîn-nak-nak)仔講:「唉哦,阿細妹ke妹仔唷,孫女仔就恁大矣,實在還好命哦!」ngài自從就m̀知吾姐婆恁出名,歸路仔ke人都識吾姐婆,還沙鼻哪。