《江嵐客家文學專欄》

| | | 轉寄

莽野密林行出路──序江嵐散文集

Liá幾年來,客家母語「復育」做出兜仔成績。政府政策上支持he動力,總he莽野密林原mò路,路he人行出來ke。江嵐算起來he「先行人」之一。佢煞猛學,盡心寫,又還頭擂擂仔教後生細人仔,值得客家社會阿腦。

  母語ke復育,一定oi做到文學書寫,正算完整,問題在書寫oi面對種種難題:古老豐富當靚ke詞語失傳大半;現代生活語言仰般納入客語書寫?外來語仰般處理?還kha壞ke he;奈位發表?寫pûn麼儕讀?故所「先行人」he mò超人ke意志力,強烈ke文化使命感,mò三日就會打卵退哩。

  多年前,福佬朋友笑ngài:你兜客家語,詩、散文、小說在奈位?當時除忒杜潘芳格、范文芳、葉日松等少數幾位外,實在yi少人做得到「客家語寫詩文」。2003年,在行政院客委會支持下,ngài lâu鍾鐵民、曾貴海三儕,編出「台灣客家文學選集」兩本。散文、小說部份除范文芳教授外,全部he請龔萬灶老師「改寫ke」。Ngài個人感到當見笑。

  江嵐這本「阿婆ke菜園」,用親切母語,寫親長故鄉,「菜園絲瓜,情愛綿綿」,因親情最能浮現母語魅力,因母語親情傳真入心。Liá就he「阿婆ke菜園」成就可觀ke地方。筆者用liá序文向讀者慎重推介,還kha期待ke he,後生朋友,讀了江嵐散文後,受佢感動,續下來也做得提筆上陣,成為母語寫手ke一員。

2008/8/1 於玉泉居