《江嵐客家文學專欄》

 | | | 轉寄

你 he我一生人ke新娘 下集

作者 Kông-làm...江嵐 2008.08.03

日仔一到，逐儕就準備定疊，無惜路頭幾遠，一心一意oi來參加佳灣ke生前告別式。佳灣著一身水紅色ke小禮服，lâu一雙佢盡合意ke白色高踭鞋，面項有化薄薄ke妝，看起來面色m̀會難看；千和著青色ke siak-chṳ結黃色ke ne-gu帶，配一條深藍色ke西裝褲，該he佢一路里來ke業務員風格打扮，he無恁仰著就無像he千和ke作風。
一台一台ke轎車，對台北、台中、高雄、台東、宜蘭……各地趕過來。
正開始ke時節大家就當緊張，m̀識辦過恁仰ke活動，大家chhiu m̀知oi用仰般ke表情lòi應付liá種場合。千和一路里來yi樂觀，總he到liá ke時節連佢乜笑m̀出來。阿舅、阿姨、叔婆、伯姆見到佳灣就揇等kieu一場，阿婆lâu阿公，還有阿爸阿姆乜在該kieu m̀會sot。顛倒liá teû後生人kha蠻皮，等到oi吃晝ke時，正陸陸續續到來，有人包紅包，有人包白包，有人買禮服oi分佳灣老行嫁（出殯） ke時節著ke，me有人買花又送禮。因爭liá he頭一擺，大家就m̀知oi仰般做kha適（tit）當，故所各打各ke鼓，各吹各ke角，各人用自家ke誠意來送佳灣盡尾一程路ke禮數。
文昇牯送一大把ke蓮花，大到連佳灣就擎（khià）m̀贏，liá種頭路就單淨佢一儕人想得出來，佢好講m̀講，liá he自家去蓮花池摘來ke，恁仰kha實在哇！害本旦嚴肅ke氣氛，分該兜kieu面kieu面ke人聽到續笑出來。自從文昇牯來到起勢，大家正試到有kha輕鬆兜仔。
Liá ke時節，千和牽等佳灣ke手，講起兩儕人he仰般接受死神ke挑戰，同堵到生死問題ke時節he仰般去面對解決，還有仰般想出liá種〈生前告別式〉ke聚會來，lâu一路行來堵tó生命ke失望、心肝肚ke 不平，一直到面對lâu包尾ke接受，同親戚朋友分享兩儕人ke目汁lâu轉換看開ke心路歷程，恁仰ke過程，分拍紀錄片ke人lâu民宿頭家試到盡感動。
細妹伴青華一路里來就盡依賴佳灣，平常時m̀管he心情m̀好ya he堵到有麼个心事，一抹煞就尋佳灣投，liá下看等恁好ke姐妹伴隨時會離開，實在m̀盼得到kieu濫sṳt-lúi，佳灣顛倒頭來安慰青華：「堵到就oi面對唷，下二擺我無在若身邊，妳oi開始學習照顧自家，學習解決事情ke能力，liá he妳一生人ke功課，oi學習獨立，kha擔硬兜仔唷，知無？m̀好kieu咧！」青華聽到恁仰ke話，kieu到還kha煞猛。
包尾，同事安安又lâu啄目睡啄目睡，面色臘黃ke佳灣補粉打扮，還換一領水青色ke洋裝。
一場〈生前告別式〉就在liá種溫暖又貼心ke氣氛中進行，各人有各人ke前途，各人有各人ke人生oi學習ke功課，大家對liá場〈生前告別式〉肚項，學習到自家ke功課，歸ke民宿草坪續變成一ke細細ke溫馨天堂，大家談論到斷烏還無想oi轉，kha遠來ke，將就臨時留下來歇，本來一日ke行程續變到二日，該暗晡就在民宿廳下，開一ke kha深入ke心靈暗會。佳灣看起來ngiem-ngiem精神當m̀好，一下睡一下醒，雙方ke爺哀就痛nat-nat仔掌等佢，阿婆ke手拉等佳灣，差m̀多m̀識放手過，下把仔就看得到阿婆緊拭目汁，緊摸佳灣ke面，歸日咧阿婆ke目汁m̀識停過，千和緊挲阿婆ke背囊，又拿衛生紙同阿婆then拭目汁，恁仰ke場景分唇邊ke人看到鼻公酸軟。
Liá擺ke〈生前告別式〉辦來盡成功，連葬儀社同保險公司ke人員就到現場，還在會後留下來lâu佢兜then手規劃喪葬細節lâu所費，保險專員乜lâu佳灣ke死亡給付算到清清楚楚，屋家人lâu收到ke禮金算算咧，足足做得辦一場簡單ke喪葬費。一等重要ke he，佳灣試到自家做得面對人生盡大ke事情──死神ke來臨，還做得有時間lâu liá一生人來盡惜佢、照顧佢ke親戚朋友當面講一句「恁仔細」、「承蒙你ke照顧」！
佢兜決定lâu liá筆錢貯到銀行，等到需要ke時節正領出來用。〈生前告別式〉辦忒kai ko月，佳灣就恬恬仔來離開世間，屋家人無再ko麻煩大家，恬恬仔用盡簡單ke儀式送佳灣盡後一程。
Liá日，千和著一身西裝，親身lâu佳灣ke金斗盎仔扐（let）等，擎烏遮仔，用最虔誠ke心意lâu佳灣ke骨灰送去塔項，再ko lâu佳灣上香講：「你 he我一生人ke新娘。」
等事情辦理圓滿，正上網lâu大家通知，感謝大家參與上擺ke〈生前告別式〉，如今佳灣既經圓滿行過一生人，請大家心中相送就好。