《江嵐客家文學專欄》

| | | 轉寄

Â-phò ke sú-pha...阿婆ke手帕

listen


Chak yit-lûi ngiu̍k-làn-fâ
摘一蕊玉蘭花
Mén-tó Â-phò ke sú-pha
愐到阿婆ke手帕
Tú-hong yû Â-phò ke sṳ̂-kôi
肚項有阿婆ke私頦
Lâu ngài lióng sà se-se ke pi-me̍t
Lâu我兩儕細細ke秘密
Â-phò ke tái-sâm-é tú-hong
阿婆ke底衫仔肚項
Ke-chak si-kok-hìn ke sâm-thoi-tú
該隻四角形ke衫袋肚
Yû yit-thiàu khiu-khiu ke fâ-sú-kîn
有一條舊舊ke花手巾
Sṳt lâu ngài chhu̍t muk-chṳp chhu̍t heú-lân
識lâu我捽目汁 捽口瀾
Me sṳt chhòi ngài tiet-to thai-mà-khûng ke
乜識在我跌到大嫲孔ke
Kiok-chhit-theù hong chhu̍t hiet
腳膝頭項捽血
Yung to khiu leh
用到舊咧
Chhiu nâ-lòi pâu sṳ̂-kôi
就拿來包私頦
Ke thiàu sú-pha
該條手帕
Yû yit-chak khûng
有一隻孔
Yit-chak-chak ngiùn-kok-è
一隻隻銀角仔
Chhiu voi pî-lòi ngài-ke sâm-thoi-tú
就會飛來我ke衫袋肚
Chhìm ngài liau-liòng
尋我聊涼